Gəncədə növbəti futbol bayramı yaşanacaqmı? - YENİLƏNİR

Bu gün Misli premyer-liqasında növbəti – 4-cü tura start veriləcək.

"Football-plus.az" xəbər verir ki, üç gün ərzində keçiriləcək oyunlar “CBC Sport”un efirində canlı yayınlanacaq.

Misli premyer-liqası
1-ci dövrə, 4-cü tur
4 sentyabr
Qəbələ – İmişli
“Qəbələ”nin bu rəqiblə ev oyunlarının balansı: 2:+1=0-1, 3:3.
2026/27 – 3:2, 0:1.
Cəzalı: yoxdu.
“Futbol+”in proqnozu: 30-30-40.
Hakimlər: RAUF CABBAROV, Rahil Ramazanov, Tərlan Talıbzadə, Rəvan Həmzəzadə.
VAR hakimi: Rəşad Əhmədov.
VAR hakiminin köməkçisi: Eyyub İbrahimov.
Hakim-inspektor: İmanxan Sultani.
AFFA nümayəndəsi: Azər Əsgərov.
Qəbələ, şəhər stadionu. Saat 18.00.

“Qəbələ”nin mövsümə uğursuz başlaması, daha dəqiq olsaq, ilk üç turda qələbə qazana bilməməsi baş məşqçi Kaxaber Sxadadzenin yola salınması ilə nəticələndi. Odu ki, komanda “İmişli” ilə oyuna Amil Ağacanov – Miloş Yevtiç məşqçilər duetinin rəhbərliyi altında hazırlaşıb. Bəli, “qırmızı-qaralar” ardıcıl dördüncü görüşü “doğma divarlar” arasında keçirəcək. Lakin hadisələrin indiyəqədərki axarı bölgə təmsilçisinin bu fürsətdən yararlanmaqda aciz qaldığını ortaya qoyub. İlk üç turda səfərdə oynamağa məcbur olan “İmişli” isə artıq ilk qələbəsini bayram edib. Bu səbəbdən Aran təmsilçisinin daha güclü görünəcəyini proqnozlaşdıra bilərik. Ancaq meydan sahibləri də xal ehtiyatını artırmağın yollarını tapmalıdı. Əks halda, durum daha vahiməli olacaq.

Komandalar indiyə qədər 3 dəfə qarşılaşıb. Bunların 1-də “qırmızı-qaralar”, 1-də “pələnglər” qələbə qazanıb. Topların nisbətində bərabərlik var - 5:5.

Kəpəz – Şamaxı
“Kəpəz”in bu rəqiblə ev oyunlarının balansı: 14:+4=5-5, 10:14.
2010/11 – 1:0; 2011/12 – 0:1; 2012/13 – 0:2; 2015/16 – 0:0, 1:1; 2016/17 – 0:0, 1:0; 2017/18 – 0:1, 1:1; 2022/23 – 2:1, 3:2; 2024/25 – 0:2, 1:1; 2025/26 – 0:2.
Cəzalı: yoxdu.
“Futbol+”in rpqonozu: 40-30-30.
Hakimlər: VÜQAR HƏSƏNLİ, Rəhman İmami, Gülnurə Əkbərzadə, Namiq Bəkirov.
VAR hakimi: Nicat İsmayıllı.
VAR hakiminin köməkçisi: Teymur Teymurov.
Hakim-inspektor: Əmrah İbrahimov.
AFFA nümayəndəsi: Elman Musayev.
Gəncə, şəhər stadionu. Saat 20.15.

Mövsümə “Sabah”a uduzmaqla start verən “Kəpəz” Qərb derbisində qələbə qazanmaqla hamını təəccübləndirdi. Çünki çempionluq uğrunda mübarizə aparan “Turan Tovuz”u yenmək asan vəzifə deyildi. Yenə evdə meydana çıxacaq “sarı-göylər” bu dəfə də on mindən çox azarkeşini sevindirməyə çalışacaq. Yenilənmiş Gəncə şəhər stadionunda anşlaq olacağı dəqiqdi. Azı ona görə ki, klub bu görüş üçün biletləri əvvəlki matçla müqayisədə daha ucuz qiymətə satışa çıxarıb. Belədə rəqibin – “Şamaxı”nın daha diqqətli, ehtiyatlı və məsuliyyətli davranmasında fayda var. Çünki hələ ilk qələbəsini əldə edə bilməyən “şirlər” uğursuz seriyanı gec olmadan qırmalıdı. Görək, adaş baş məşqçilər, demək olar, sıfırdan formalaşdırdığı kollektivlərlə uğura çata biləcəkmi?

Bu komandalar indiyə qədər 41 dəfə üz-üzə gəlib. Həmin oyunların 10-da “Kəpəz”, 21-də “Şamaxı” qələbə qazanıb, 10-da qalib müəyyənləşməyib. Topların nisbətində “şirlər” öndədi - 67:42.

5 sentyabr
Sabah – Zirə
“Sabah”ın bu rəqiblə ev oyunlarının balansı: 15:+5=5-5, 20:19.
2018/19 – 2:1, 0:3; 2019/20 - 2:2; 2020/21 – 0:1, 2:1; 2021/22 – 3:3, 3:1; 2022/23 – 1:0, 0:0; 2023/24 – 0:1, 0:1; 2024/25 – 0:2, 1:1; 2025/26 – 3:0; 2026/27 – 2:2.
Cəzalı: yoxdu.
“Futbol+”in proqnozu: 40-40-20.
Hakimlər: İNQİLAB MƏMMƏDOV, Namiq Hüseynov, Zöhrab Abbasov, Əli Əliyev.
VAR hakimi: Tural Qurbanov.
VAR hakiminin köməkçisi: Asiman Əzizli.
Hakim-inspektor: Zöhrab Qədiyev.
AFFA nümayəndəsi: Emin Cəfərov.
Bakı, “Bank Respublika Arena”. Saat 18.30.

Düzdü, “Sabah” ilk turlarda vəziyyətdən çıxış yolu tapa bildi. “Kəpəz” və “Araz-Naxçıvan”ı çətinliklə məğlub edən komanda “Sumqayıt”a qarşı matçı təxirə saldı. Ancaq “Zirə” ilə oyun daha çətin sınaqdı. Çünki rəqib ardıcıl qələbələrlə zirvədədi. Üstəlik matçın “Mançester Yunayted”lə qarşılaşma ərəfəsində olması baş məşqçi Valdas Dambrauskasın heyətdə rotasiyalar etməsinə gətirib-çıxara bilər. Yenə də “bayquşlar”a yuxarıdan aşağı baxmaq olmaz. Ona görə ki, komanda həm də geniş, təcrübəli futbolçulardan qurulan heyətə malikdi. Deməli, Yuri Vernidubun ardından Dambrauskası da məğlub etmək eşqinə düşən Rəşad Sadıqov komandasına daha diqqətli olmağı tapşırmalıdı. Axı oyun həm də paytaxt derbisi statusu daşıyır.

Bu kollektivlər indiyə qədər 30 dəfə qarşılaşıb. Bu matçlardan 12-də “Sabah”, 8-də “Zirə” qələbə qazanıb, 10-da “sülh” qeydə alınıb. Topların nisbətində “bayquşlar” öndədi – 40:32.

Neftçi – Şəfa
“Neftçi” bu rəqiblə evdə ilk dəfə qarşılaşacaq.
Cəzalı: Elvin Bədəlov (Neftçi).
“Futbol+”in proqnozu: 50-30-20.
Hakimlər: ƏLİYAR AĞAYEV, Zeynal Zeynalov, Akif Əmirəli, Elvin Bayramov.
VAR hakimi: Fərid Hacıyev.
VAR hakiminin köməkçisi: Cəmil Quliyev.
Hakim-inspektor: Babək Quliyev.
AFFA nümayəndəsi: Novruz Əzimov.
Bakı, “Palms Sports Arena”. Saat 20.30.

“Futbol ili”nə ümidverici başlayan “Neftçi” “Zirə”yə uduzmaqla azarkeşlərini üzdü. Bununla həm də zirvəni əldən verən “ağ-qaralar”ın çempionluq hədəfindən uzaq düşməmək üçün qələbəyə ehtiyac var. Azı ona görə ki, debütanta məğlubiyyət komandanı daha dərin psixoloji böhrana sürükləyə, tərəfdarların səbr kasasını daşıra bilər. Çətin səfər matçı keçirəcək “Şəfa” isə meydanı azı bir xalla tərk etməyin yolunu tapmalıdı.

6 sentyabr
Turan Tovuz – Sumqayıt
“Turan Tovuz”un bu rəqiblə ev oyunlarının balansı: 8:+4=1-3, 12:13.
2022/23 – 1:0, 2:3; 2023/24 – 2:2, 1:4; 2024/25 – 1:0, 1:2: 2025/26 – 2:1, 2:1.
Cəzalı: Səbuhi Abdullazadə (Sumqayıt).
“Futbol+”in proqnozu: 50-30-20.
Hakimlər: KAMRANBƏY RƏHİMOV, Şirməmməd Məmmədov, Kərim Zeynalov, Ruslan Quliyev.
VAR hakimi: Kamal Umudlu.
VAR hakiminin köməkçisi: Vüsal Məmmədov.
Hakim-inspektor: Orxan Məmmədov.
AFFA nümayəndəsi: Seymur Səlimli.
Tovuz, şəhər stadionu. Saat 18.00.

“Turan Tovuz” da uğursuzluqlarla erkən üzləşən komandalar sırasındadı. “Şamaxı” ilə heç-heçə edən, “Kəpəz”ə uduzan “bozqurd” tərəfdarlarının ağır tənqidlərinə məruz qaldı. Bölgə təmsilçisi evdə “Sumqayıt”ı məğlub etməli, bununla günahını yumalıdı. Böyük ehtimalla, daha bir xal itkisi baş məşqçi Kurban Berdıyevın yola salınması ilə nəticələnəcək. O başqa məsələ ki, “kimyaçılar” da eyni durumdadı. Filipe Kandidonun kollektivi hələ də cari mövsümdə ilk qələbəyə həsrət qalıb. Odu ki, hər iki tərəf yalnız qələbə uğrunda mübarizə aparacaq.

Bu komandalar indiyə qədər 15 dəfə üz-üzə gəlib. Həmin qarşılaşmaların 7-də “Turan Tovuz”, 4-də “Sumqayıt” üç xala yiyələnib, 4-də heç-heçə olub. Topların nisbətində “bozqurd” öndədi – 21:17.

Qarabağ – Araz-Naxçıvan
“Qarabağ”ın bu rəqiblə ev oyunlarının balansı: 8:+8=0-0, 24:3.
2000/01 – 1:0; 2001/02 – 3:0; 2023/24 - 2:1, 3:1; 2024/25 – 2:0, 2:0; 2025/26 – 5:1, 6:0.
Cəzalı: Kadi Borges (Qarabağ).
“Futbol+”in proqnozu: 60-30-10.
Hakimlər: CAVİD CƏLİLOV, Kamran Bayramov, Müslüm Əliyev, Emin Əliyev.
VAR hakimi: Elçin Məsiyev.
VAR hakiminin köməkçisi: Pərvin Talıbov.
Hakim-inspektor: Munis Abdullayev.
AFFA nümayəndəsi: Elgiz Abbasov.
Bakı, Tofiq Bəhramov adına Respublika stadionu. Saat 20.15.

Avrokuboklarda mübarizəni dayandırandan sonra bütün diqqətini premyer-liqaya yönəldən “Qarabağ” itkisiz irəliləyir. “Şamaxı” və “Sumqayıt” üzərində qazanılan qələbələr komandanın psixoloji durumunu bir qədər yaxşılaşdırıb. Daha bir qələbə vacibdi ki, həm əsas rəqiblərlə mübarizədə şanslar artsın, həm də əhval-ruhiyyə bir qədər də yüksəlsin. Öz aramızdı, bunun üçün “Araz-Naxçıvan” münasib rəqibdi. Bəli, “qırmızı-ağlar” “Sabah”la matçda pis təsir bağışlamadı. Lakin məhz bu iki komandanın duelləri əksər hallarda ağdamlıların üstünlüyü şəraitində keçib.

Ümumiyyətlə, komandalar indiyə qədər 15 dəfə üz-üzə gəlib. Bunların 11-də “Qarabağ”, 3-də “Araz-Naxçıvan” qələbə qazanıb, 1-də qalib müəyyənləşməyib. Topların nisbətində “köhlən atlar” öndədi – 42:14.

Bu komandaların duelləri ilə bağlı maraqlı məqamlar
// “İmişli” hər üç oyunda qol vurub. “Qəbələ”nin ev oyunlarında heç-heçə qeydə alınmayıb.
// “Şamaxı” son 5 oyunda qol vurub. “Kəpəz” son 2 matçda qol vurmayıb və xal qazanmayıb.
// “Sabah” son 6 oyunda qol vurub. “Zirə” son üç səfərdə qalib gəlməyib.
// “Turan Tovuz” son 4 matçda qalib gəlib. Son üç oyunun hər birində 3 qol qeydə alınıb.
// “Qarabağ” son 7 qarşılaşmada qələbə qazanıb. Ağdam klubu son 3 görüşdə 5 və ya daha çox qol vurub.

1. Zirə 3 3 0 0 6-1 9
2. Neftçi 3 2 0 1 8-2 6
3. Qarabağ 2 2 0 0 4-1 6
4. Sabah 2 2 0 0 3-0 6
5. Turan Tovuz 3 1 1 1 1-1 4
6. İmişli 3 1 1 1 2-3 4
7. Kəpəz 2 1 0 1 1-2 3
8. Şəfa 3 1 0 2 1-3 3
9. Şamaxı 3 0 2 1 1-3 2
10. Qəbələ 3 0 1 2 0-2 1
11. Araz-Naxçıvan 3 0 1 2 0-6 1
12. Sumqayıt 2 0 0 2 1-4 0

Bombardir: Breno Almeyda (Neftçi) - 4.

KƏNAN BAHADIR