Türkiyə futbolunda son günlərin ən önəmli xəbəri Məsut Özilin ''Fənərbaxça''dan ayrılması və ''İstanbul BŞ''yə keçməsi oldu.

"Football-plus.az" xəbər verir ki, bu gün dünyaca ünlü futbolçu üçün yeni klubunda imza mərasimi təşkil olundu. Tədbirdə başakşəhərlilərin prezidenti Göksəl Gümüşdağ keçidin detalları barədə müəyyən məlumatlar verdi. O, Özilə ikiillik müqavilə təklif etdiklərini, amma futbolçunun ''1+1'' illik müqavilədə israr etdiyini dedi. Bundan başqa Gümüşdağ Məsutun illik məvacibini konkret olaraq açıqlamasa da, bu futbolçunun böyük fədakarlıqlar etdiyini və onun maaşının komanda yoldaşlarınınkından elə də çox fərqlənməyəcəyini bildirdi. Daha sonra söz Özilin özünə verildi: ''Burda əsil ailə ab-havası var və hər oyunçu özünü gözəl hiss edir. ''İstanbul BŞ''yə gəldiyim üçün sevincliyəm. Yeganə istəyim futbol oynamaqdı. ''10'' nömrəli forma Berkay Özcan qardaşımdadı. Onunla danışdım və bu nömrəni mənə verməsində heç bir problem görmədiyini dedi. Qarşıdakı mövsüm ''10'' məndə olacaq.

''Fənərbaxça'' hər zaman qəlbimdə qalacaq. Həmişə o klubun fanatı kimi qalacam. Onlara gələcəkdə uğurlar arzulayıram. Əslində ''Fənərbaxça'' ilə bağlı çox da danışmaq istəmirəm. Artıq o mövzu mənim üçün bitdi. Yeni klubumda xoşbəxt olmaq istəyirəm. ''Fənərbaxça''da bu xoşbəxtliyi tapa bilmədim. Düzdü, ən böyük arzum o klubda oynamaq idi. Amma həyatda və futbolda bəzən sənin istəmədiyin şeylər baş verir. Artıq bütün diqqətimi ''İstanbul BŞ''yə yönəldəcəm. 1 ildən sonra oturub gələcəyimi müzakirə edəcəyik. Bir ''Fənər''li olaraq Türkiyədə o klubdan başqa yalnız ''İstanbul BŞ''də forma geyə bilərdim. Ailəm və məni əhatə edən insanlar da bu seçimimi müsbət qarşıladı. Təkbaşına, fərdi məşq etmək çətindi. Yeni klubumda məşqlərə başlamışam və hər şey qaydasındadı. Əmrə Belözoğlu mənə öz planları və oyun fəlsəfəsi barədə məlumat verib. Onunla zatən həmişə münasibətlərimiz yaxşı olub. Ən böyük arzum zədəsiz bəlasız bir mövsüm keçirməkdi''.