Mişi Batşuayinin ''Fənərbaxça''dan ''Qalatasaray''a yollanmasının ardından İstanbul nəhəngləri arasında bu yayın daha bir diqqətçəkən keçidi rəsmiləşmək üzrədi.

''Beşiktaş''la müqavilə müddəti başa çatan Cenk Tosun heç cür rəhbərliklə yeni anlaşma əldə edə bilmədi. Şaiyələrə inansaq, həm yeni baş məşqçi Covanni van Bronxorst Cenkin komandada qalmasını istəmədi, həm də onun maaş tələbi rəhbərliyi qane etmədi. Fürsətdən istifadə edən ''Fənərbaxça'' isə təcrübəli futbolçunun şərtləri ilə razılaşaraq onunla ilkin anlaşma əldə edib.

Türkiyə mətbuatının sürpriz iddiasına görə Cenk ''sarı-lacivərdlilər''lə ikiillik müqavilə imzalayacaq. Bu iki il ərzində onun ümumi qazancı, imza parası və bonuslar daxil olmaqla 2,5 milyon avronu ötməyəcək. 33 yaşlı futbolçunun keçidi ilə bağlı rəsmi açıqlamanın ən qısa müddətdə veriləcəyi gözlənilir.

Qeyd edək ki, ''Ayntraxt'', ''Qaziantepspor'', ''Everton'' və ''Kristal Pelas''da da forma geymiş futbolçu karyerasının ən parlaq illərini ''Beşiktaş''da keçirib. 2014-cü ildən başlayaraq 3 fərqli dönəmdə ''ağ-qaralar''ın şərəfini qoruyan Tosun bu müddətdə 226 rəsmi oyuna çıxaraq 96 qol, 28 məhsuldar ötürmə ilə fərqlənib və 5 titul qazanıb.

ƏLİ