Məlumdu ki, “Sabah”, “Qarabağ” və “Zirə”nin avrokubok matçlarının taleyi həm də hakimlərin qərarlarından asılıdı. Əlbəttə, arzumuz oyunların ədalət prinsipləri əsasənda idarə edilməsi, daha dəqiqi, komandalarımızın haqqının hansısa səbəbdən yeyilməməsidi.

Təbii ki, bu məqamda həm də “qarapaltarlılar”ın təcrübəsi ön plana çıxır. Odu ki, həmin referilər haqda daha ətraflı məlumat verməyə çalışacağıq.

Patrik Qritseviç. Polşalı “fit sahibi” 1995-ci ildə Torun şəhərində anadan olub. Ədalət təmsilçisi Polşanın ünlü futzal hakimlərindən Yaroslav Qritseviçin övladıdı. Karyerasına 3-cü liqada başlayan referi qısa müddətdə özünü sübut edə bilib. Qritseviç ilk oyununu 2018-ci ildə idarə edib. 2022-ci ildə əsas çempionatda debüt edən polşalı 2024-cü ildən FİFA referisi statusu alıb. Sözügedən hakim Ekstraklasada keçirdiyi 53 matçda 252 sarı, 11 qırmızı vərəqə göstərib.

Qritseviçin beynəlxalq karyerası o qədər də zəngin deyil. Ümumiyyətlə, “Sabah”ın matçı onun Çempionlar Liqasında debütüylə əlamədar olacaq. Konfrans Liqasının təsnifat mərhələsində 1 oyun idarə edən hakim hələ Avropa Liqasında debüt etməyib. Kəsəsi, Qritseviç üçün avrokuboklar karyerasında yenicə açılan səhifədi. Amma o, beynəlxalq yoldaşlıq oyunlarında, Gənclər Liqasında, 17 və 21 yaşadək futbolçuların Avropa çempionatının seçmə mərhələsindəki matçlarında iş başında olub. Qritseviç ilk dəfə təmsilçilərimizdən birinin qarşılaşmasında forma geyəcək.

Ümumiyyətlə, bu hakim karyerası ərzində 180 matç idarə edib. Həmin görüşlərdə futbolçuları 920 sarı, 49 qırmızı vərəqə ilə cəzalandırıb.

Roman Jitari. Moldovalı 1990-cı ildə dünyaya göz açıb. Hakim karyerasına birinci liqadan başlayan Jitari burda cəmi 3 oyun idarə etdikdən sonra superliqa matçlarında iş başında olub. O, bu çərçivədə keçirdiyi 50 matçda 203 sarı, 6 qırmızı vərəqəylə yadda qalıb.

Jitarinin beynəxalq karyerası zəngin deyil. İndiyə qədər Konfrans və Çempionlar Liqasının təsnifat mərhələlərində idarəçilik edən referi ilk dəfə Avropa Liqasında iş başında olacaq. Bundan başqa, ədalət təmsilçisi Gənclər Liqasında, 17, 19 və 21 yaşadək futbolçuların Avropa çempionatının seçmə mərhələsindəki matçlarda fəaliyyət göstərib. Maraq üçün qeyd edək ki, Jitari ötən ay Moldova ilə Bolqarıstan arasında keçirilən, bizim Tural Qurbanovun baş hakimi olduğu yoldaşlıq görüşündə dördüncü hakim olub. Referi həmin vəzifəni 2022-ci ildə Moldova ilə Azərbaycan millilərinin qarşılaşdığı beynəlxalq yoldaşlıq matçında da icra edib.

Ümumiyyətlə, Jitari karyerası ərzində 90 matçda iş başında olub. O, bu qarşılaşmalarda 345 sarı, 13 qırmızı vərəqə göstərib.

Yani Hüytiya. Fin hakim 1988-ci ildə Turkuda dünyaya göz açıb. Yüksək liqada ilk matçını 2017-ci ildə keçirib. Ədalət təmsilçisi bu çərçivədə iş başında olduğu 110 qarşılaşmada oyunçulara 421 sarı, 17 qırmızı vərəqə göstərib.

Hüytiya 2021-ci ildən bəri FİFA referisidi. Hələ Avropa Liqasında debüt edə bilməyən “fit sahibi” Konfrans Liqasının təsnifat və əsas, Çempionlar Liqasının yalnız təsnifat mərhələlərində iş başında olub. Hakim bundan başqa Gənclər Liqasında, 17, 19 və 21 yaşadək futbolçuların Avropa çempionatlarında oyunlar idarə edib. Hüytiya beynəlxalq yoldaşlıq görüşlərində də forma geyib. Maraq üçün qeyd edək ki, “qarapaltarlı”nın xidmətində latviya və Farer adaları kimi ölkələrdə də ehtiyac duyulub.

Ümumiyyətlə, Hüytiya indiyə qədər idarə etdiyi 276 qarşılaşmada futbolçuları 950 sarı, 45 qırmızı vərəqə ilə üzüb.

KƏNAN BAHADIR