Xəbər verdiyimiz kimi, millimizin DÇ-2026-nın seçmə mərhələsi çərçivəsində Fransanın qonağı olacağı matçın baş hakimi Rohit Saqqidi. Kimdi o?

“Football-plus.az”ın məlumatına görə, adı çəkilən hakimin karyerası haqda xoş fikirlər səsləndirməyə dəyər. Ona görə ki, Norveçdən olan FİFA referisi özünü sahəsi üzrə qısa müddətdə sübut edə bilib.
33 yaşlı ədalət təmsilçisi ölkəsinin əsas liqasında idarə etdiyi 178 matçda 649 sarı, 33 qırmızı vərəqə göstərib. 2017-ci ildən bəri FİFA referisi statusu daşımağa başlayıb.

O, beynəlxalq karyerası ərzində həm Çempionlar, həm Konfrans, həm də Avropa Liqasının təsnifat və əsas mərhələlərində iş başında olub. Gənclər və Millətlər Liqasında da şans qazanan Saqqi beynəlxalq yoldaşlıq oyunlarını da idarə edib. Referiyə 21 yaşadək futbolçulardan arasında Avropa çempionatında da güvənilir.

Ədalət təmsilçisinin bizə tanış olduğunu da vurğulayaq. Belə ki, o, ötən il Millətlər Liqasının Azərbaycan – Slovakiya matçında (1:3) baş hakim olub. İddia edə bilərik ki, Fransa ilə matçı idarə edəcək hakimin Saqqi olacağını eşidən Mahir Emrelinin kefi pozulub. Ona görə ki, referi həmin matçın 70-ci dəqiqəsində hücumçuya ikinci “sarı”dan qırmızı vərəqə göstərərək meydandan qovub.

Saqqini “Neftçi” azarkeşləri də tanıyır. Çünki o, 2022-ci ildə Konfrans Liqasının 3-cü təsnifat mərhələsinin “Rapid” – “Neftçi” matçında da (2:0, ilk oyun 1:2) fit çalıb. Məğlubiyyət “ağ-qaralar”ın avrokuboklarda mübarizəni dayandırmasıyla nəticələnib.

Ümumiyyətlə, Saqqi karyerası ərzində 313 matç idarə edib. O, bu oyunlarda 1181 sarı, 60 qırmızı vərəqə göstərib.

KƏNAN BAHADIR