“Araz-Naxçıvan” bu gün Konfrans Liqasının 3-cü təsnifat mərhələsinin ilk oyununda “Omoniya”nı qəbul edəcək.

Bəllidi ki, bu oyunda favorit Cənubi Kipr təmsilçisidi. Yəni komandamızın işi onsuz da çətindi. Belədə hakim idarəçiliyində mümkün qüsur naxçıvanlıları sarsıda bilər. Odu ki, baş hakim Andrey Berkanı daha yaxından tanımaqda fayda var.

“Football-plus.az” adı çəkilən hakim haqda ətraflı məlumatı təqdim edir.

Andrey Berka... Karyerasına 2016-cı ildə başlayan ədalət təmsilçisi 2021-ci ildə FİFA referisi adına layiq görülüb. 37 yaşlı çexiyalı ölkəsinin əsas çempionatında idarə etdiyi 157 matçda 655 sarı, 35 qırmızı vərəqə göstərib. Bundan başqa, o, 17 və 21 yaşadək futbolçuların Avropa çempionatının seçmə mərhələ matçlarında, avrokubokların bütün turnirlərinin təsnifat mərhələlərində, Avropa və Konfrans Liqalarının əsas mərhələsində, həmçinin Gənclər və Millətlər Liqalasında baş hakim kimi şans qazanıb.

Berka əsas və U-21 millilərimizin oyununu da idarə edib. “Fit sahibi” əsas yığmanın AÇ-2024-ün seçmə mərhələsi çərçivəsində Estoniyanı qəbul etdiyi matçda (1:1), U-21 yığmamızın isə AÇ-2023-ün seçmə mərhələsi çərçivəsində evdə Xorvatiyayla qarşılaşdığı oyunda iş başında olub. Berka U-21 yığmamızın görüşündə Turan Vəlizadəyə qırmızı vərəqə göstərib.

Ədalət təmsilçisi karyerası ərzində 373 görüş idarə edib. O, bu matçlarda 1528 sarı, 64 qırmızı vərəqə üçün əlini cibinə atıb.

KƏNAN BAHADIR