Avrokuboklarda yeni mövsümün həyəcanının başlanmasına sayılı günlər qaldı. Məlum olduğu kimi, iyulun 7-də “Sabah” – “Nyu Seynts”, 8-də “Zirə” – “Torpedo”, 9-da “Qarabağ” – “Vestri” matçlarına şahidlik edəcəyik.

Qarşıdan gələn “futbol ili”nə Avstriyanın Tirol bölgəsində hazırlaşan “Sabah”la “Qarabağ” da təlim-məşq toplanışının əsas mərhələsini başa vurub, Türkiyənin Bolu şəhərində olan “Zirə” də. Bəs, rəqiblərin düşərgələrində durum nə yerdədi?

“Nyu Seynts” “Sabah”ın üç təhlükəli futbolçusundan yazdı
“Sabah”ın Çempionlar Liqasındakı rəqibi “müqəddəslər” qəzetimizin çap olunmadığını günlərdə nə transfer edib, nə də yoxlama oyunu keçirib. Ancaq Uels təmsilçisinin rəsmi saytında “bayquşlar”la bağlı geniş yazı dərc olunub. Yazıda Masazır təmsilçisinin yarandığı gündən bəri keçdiyi yoldan bəhs edilib. Klubun tarixinə, qazandığı uğurlara, sisteminə toxunulub, rəqiblər üçün ciddi təhlükə sayılan futbolçulardan söz açılıb. Yazının əsas şəkil bölməsinə “Sabah”ın çempionluğu qeyd edərkən çəkilən foto əlavə olunub. Sizi həmin məqalənin önəmli məqamlarıyla tanış edirik: “Sabah” 2017-ci ildə təsis edilməsinə baxmayaraq, investisiyalar, iddialı oyunçuların transferi və ölkə daxilində əldə olunan uğurlar sayəsində Azərbaycanın aparıcı klublarından biri kimi özünü təsdiqləyib. Başa çatan mövsümdə “qızıl dubl” edən komanda “Qarabağ”ın uzun müddətdi davam edən hegemonluğuna son qoyub. Böyük maliyyə dayaqları olan klub Azərbaycanın ən güclü heyətini qurub. “Sabah” yalnız cari yay “transfer pəncərəsi”ndə təxminən 950 min avro xərcləyib. Komandanın son dörd mövsümdəki transfer xərcləri 4,4 milyon avro olub. Yəni “Nyu Seynts” təkcə çempionla yox, həm də Avropa səhnəsində müntəzəm yarışmaq gücündə olan komanda ilə qarşılaşacaq. Litvalı Valdas Dambrauskasın zəngin təcrübəsi “Sabah”ın taktiki çevikliyini və strukturlaşdırılmış hücum oyununu böyük ölçüdə yaxşılaşdırıb. Rəqib hazırda Azərbaycanın ən mütəşəkkil heyətinə malikdi. Təsəvvür edin, hücumçuları mövqelərini tez-tez dəyişir, cinah müdafiəçiləri daim hücumlara dəstək verir. Onlar həm də sürətli əks-hücum qabiliyyətinə malikdilər. Rəqibin ən təhlükəli futbolçusu Coy-Lens Mikelsdi. Almaniyalı həm mərkəzdən, həm də cinahlardan hücum edə bilir. Müdafiə xəttinin arxası onun ən təhlükəli olduğu mövqedi. Aaron Maluda sürətli və yaradıcıdı. Florent Maludanın oğlu hər iki ayağı ilə rahatlıqla müdafiəçiləri məğlub edir və hücum imkanları yaratmaq üçün tez-tez mərkəzi zonalara irəliləyir. Timoteuş Puxaç hücumları irəli qaçışlarla dəstəkləyir və cərimə meydançasına keyfiyyətli ötürmələr edir. O, “Sabah”ın əsas standart vəziyyətlərində iş başında olur. Hər halda, bu rəqiblə ilk dəfə qarşılaşacağıq. Bu o deməkdi ki, Avropa səyahətimizə daha bir səhifə əlavə olunacaq”.
“Vestri” sabah meydana çıxacaq
“Qarabağ”ın Avropa Liqasının 1-ci təsnifat mərhələsindəki rəqibi “Vestri”ylə bağlı hansısa yenilik yoxdu. İslandiya təmsilçisi ölkə çempionatının 12-ci turunda “Qrindavik”ə qarşı keçirəcəyi oyuna hazırlaşır. Bu qarşılaşma bu gün keçiriləcək. Növbəti oyun isə artıq “Qarabağ”a qarşı olacaq.
“Torpedo” Superkobuk qazandı
“Zirə”nin Konfrans Liqasının 1-ci təsnifat mərhələsindəki rəqibi “Torpedo” srağagün Gürcüstan Superkuboku uğrunda final oyununa çıxıb. Həlledici matçda “İberiya” ilə qarşılaşan Kutaisi təmsilçisi matçın qalibi olub. Yarımfinalda kubokun sonuncu qalibi “Dila”nı məğlub edən (1:0) komanda əsas vaxtı 2:2 hesabı ilə yekunlaşan görüşün penalti seriyasında qələbə qazanıb (6:5). Maraq üçün rəqibin 83-cü dəqiqədə azlıqda qaldığını da qeyd edək. “Torpedo”nun baş məşqçisi Dirk Şuster bu qarşılaşmada aşağıdakı futbolçuların xidmətindən yararlanıb: 1. Oto Qoşadze, 4. Matey Simiç, 22. Dato Bukiya, 16. Sori Mane, 2. Varley (6. Muhammed Şerif, 76), 7. Vladimir Mamulaşvili (k), 20. Dino Skorup (35. Dieqo Deysadze, 55), 15. Luka Kuprava, 14. Felipe Pires, 9. Komnen Andriç, 11. Georgi Arabidze (39. Vircil Pirson, 66).
“İberiya”nın ölkə çempionatında 34 xalla liderlik etdiyini, “Torpedo”dan 7 xal öndə olduğunu nəzərə alsaq, Kutaisi təmsilçisi yetərincə önəmli və çətin qələbə qazanıb. Komandanın növbəti oyunu “Zirə”yə qarşı olacaq. Odu ki, bu qələbəni “Zirə” üçün ciddi təhlükə saya bilərik. Çünki Şusterin kollektivi bunun sayəsində yaxşı motivasiya mənbəyi qazandı.
Sonda onu da qeyd edək ki, komandaların ölkəmizə səfər planı hələ açıqlanmayıb. Onların tribunalarda nə qədər azarkeşinin olacağı da bəlli deyil.
KƏNAN BAHADIR