Türkiyə çempionatından növbəti istefa xəbəri var.

Mövsümə yaxşı başlayan, amma maddi problemlər üzündən ciddi böhrana düşən ''Kayserispor'' Rəcəp Uçar ilə yollarını ayırmaq məcburiyyətində qalıb. Rəhbərlik dünən axşam məşqinin ardından bu mütəxəssislə görüşərək və onunla qarşılıqlı şəkildə anlaşaraq vidalaşıb. ''Kayserispor'' son 8 rəsmi oyunun hamısında məğlub olub. Bu, klub tarixinin antirekordudu.

48 yaşlı məşqçi bu vəzifəyə ötən ilin sentyabrın əvvəllərində Çağdaş Atanın qalmaqallı istefasından sonra gəlmişdi. Kayseri təmsilçisi Uçarın dönəmində keçirdiyi 21 rəsmi oyundan 9 qələbə, 2 heç-heçə, 10 məğlubiyyətlə ayrılmış oldu. Türkiyə mətbuatının yazdığına inansaq, Rəcəp Uçarı Burak Yılmaz əvəzləyəcək. Ötən yay karyerasını başa vuran Burak bilindiyi kimi mövsümə ''Beşiktaş''da Şenol Günəşin köməkçisi vəzifəsində başlamışdı. Günəşin istefasından sonra Burak 6 oyunda baş məşqçi səlahiyyətlərini icra etmişdi.

ƏLİ