Türkiyə çempionatında 7-ci turun son oyunu darmadağın və istefa ilə əlamətdar oldu.

''Kayserispor''un qonağı olan ''Beşiktaş'' ilk yarıda rəqib qapısına yol tapa bilməsə də, fasilədən sonra 3 cavabsız qol vuraraq inamlı qələbə qazandı. İstanbul nəhəngi 6 tura topladığı xalların sayını 16-ya çatdırdı. Bu, 6-cı turlar üçün komandanın ən yaxşı göstəricisidi. ''Qartal'' daha öncə 1959/60, 1963/64, 1964/65, 1990/91, 1991/92, 2000/01 və 2003/04 mövsümlərində də 6 tura 16 xal toplamışdı. Maraqlıdı ki, bu uğurlu startların hər biri əcnəbi məşqçilərin başçılığı altında olub.

Maddi cəhətdən çox çətin dönəmdən keçən, cəza üzündən bu yay yeni oyunçular transfer edə bilməyən və 6-cı oyunu da qələbəsiz tamamlayan Kayseri təmsilçisində isə oyundan sonra baş məşqçi Burak Yılmaz istefa verdi. 39 yaşlı mütəxəssis bu vəzifəyə bu ilin yanvarında gətirilmişdi. O ötən mövsüm qarşıya qoyulan hədəfə çataraq komandanı elitada saxlamağı bacarmışdı. Amma bu mövsüm ''Kayserispor''un bu gedişlə elitada qalacağı inandırıcı görsənmir.

Mövsümün əvvəlində başqan Əli Çamlı istefa versə də, ortaya başqa namizədlər çıxmadığı üçün yenidən prezident seçilmişdi. ''Kayserispor'' Burak Yılmazın dönəmində keçirdiyi 21 oyundan 3 qələbə, 10 heç-heçə, 8 məğlubiyyətlə ayrılmış oldu.

ƏLİ