“Nəriman düşündüyümüzdən daha az müddət forma geyir” – Tural Əsgərli səbəbi açıqladı
“Qarabağ”ı “Kolambus Kryu”ya dəyişən Nəriman Axundzadənin MLS-də cidid çətinliklə üzləşdiyini xəbər vermişdik. Belə ki, “Neşvill”lə oyunda əvvəldən sona qədər ehtiyat oyunçular skamyasında əyləşən hücumçu “Toronto” ilə görüşdə 2, “Atlanta”ya qarşı matçda isə cəmi 1 dəqiqə forma geymişdi. Futbolçunun autsayder “Orlando” ilə oyunda şans qazanacağını düşünürdük ki, bu dəfə də Nərimana şans verilmədi. Həmvətənimiz Ohayo təmsilçinin 1:1 hesablı “sülh”ə razılaşdığı matçı ehtiyat oyunçular skamyasından izlədi.
Bəs, Nərimanın az şans qazanmasının səbəbi nədi?
Bu sualla futbolçunun meneceri Tural Əsgərliyə müraciət etdik. Onun “Football-plus.az”a cavabı:
“Bəli, Nərimanın az şans qazanmasıyla razıyam. Hətta düşündüyümüzdən daha az müddət forma geyir. Özüylə daim əlaqə saxlasam da, baş məşqçisiylə (Henrik Rudström – red.) əlaqəm yoxdu. Həmin mütəxəssis komandaya yeni gəlib. Bilirəm ki, baş məşqçinin ciddi narazılığı yoxdu. Çox güman, hələ əvvəldən komandada olan futbolçuları sınaqdan keçirir. Yəqin hələ onlara daha çox güvənir. Hər halda, futbol məsələləridi. Hələ klubda yenidi, komandayla birgə yeni mövsümə hazırlıq prosesində iştirak etməyib. Düşünmürük ki, Nəriman rəqabətdə uduzur. İndiyə qədər nəsə ciddi problem ortaya çıxmayıb”.
Xatırladaq ki, Axundzadə “Kolambus Kryu” ilə 3,5 illik müqavilə imzalayıb.
KƏNAN BAHADIR
Digər xəbərlər
