“Qarabağ”ın sabiq futbolçusu Nəriman Axundzadənin “Kolambus Kryu”ya keçidi fevralın 10-da rəsmiləşdi. Bu gün həmin keçiddən iki həftə ötsə də, hücumçu hələ Bakıdadı.

Daha əvvəl oyunçunun Ohayo təmsilçisinin düşərgəsinə yollanmaq üçün idmançılara görə nəzərdə tutulan P-1 vizasını almalı olduğunu yazmışdıq. Nərimanın meneceri Tural Əsgərli saytımıza açıqlamasında bunun üçün təxminən iki həftə vaxt tələb edildiyini bildirmişdi.

Bəs, məsələ nə yerdə qaldı? Hücumçunun ABŞ-yə yollanması nə vaxt mümkün olacaq?

Bu suallarla yenidən Tural bəyə müraciət etdik. “Football-plus.az”a danışan menecer bildirdi ki, viza məsələsinin həll olunacağı tarix hələ də bəlli deyil. Təxmini demək olar ki, lazım olan sənəd ya fevralın sonunda, ya da martın əvvəlində alınacaq. Bundan sonra “Qarabağ” Nəriman üçün bilet alaraq Ohayoya yola salacaq.

KƏNAN BAHADIR