Səudiyyə Ərəbistanında 23-cü tura yekun vuruldu.

"Football-plus.az" xəbər verir ki, dünən keçirilən oyunlardan sonra lider dəyişdi. Tura zirvədə daxil olan ''Əl-Hilal'' öz meydanında son çempion ''Əl-İttihad'' ilə bacara bilmədi (1:1). Baxmayaraq ki, qonaqlar 9-cu dəqiqədən etibarən, yəni demək olar, bütün oyunu azlıqda keçirdilər.

''Əl-Nəssr'' bu hədiyyədən maksimum yararlandı. Ər-Riyad təmsilçisi öz meydanında ''Əl-Həzm''i 4 cavabsız qolla darmadağın edərək liderliyə yüksəldi. Kriştiano Ronaldo qələbəyə dublla töhfə verdi. Bir ara ''Əl-Hilal''a dövlət dəstəyinin daha güclü olduğunu bildirərək oyunları boykot edən portuqaliyalı superulduz ardıcıl 3-cü qarşılaşmada fərqlənməyi bacardı. Bu mövsüm Səudiyyə Ərəbistanı çempionatında onun aktivində 20 oyunda 20 qol var.

Ümumilikdə isə 29 rəsmi oyunda 26 qol var. 22 fevral Səudiyyə Ərəbistanının quruluş günü olduğundan Ronaldo oyundan sonra bunun şərəfinə bişt adlanan yerli üst geyimi ilə fanatların və fotoreportyorların önünə çıxdı. O, matçsonu verdiyi açıqlamada ailəsinin Səudiyyə Ərəbistanında xoş qarşılandığını, bu ölkədə xoşbəxt olduğunu və hələ bir müddət də burda oynamaq istədiyini dedi. 1000 qol hədəfinə addım-addım yaxınlaşan ''Qızıl top''un beşqat qalibi peşəkar karyerasında uyğun olaraq 963 və 964-cü qollarını vurdu. İndi onu 1000 qoldan 36 qol ayırır.

Ən heyrət doğuran məqam odu ki, Ronaldo bu 964 qoldan 501-ni 30 yaşı tamam olduqdan sonra vurub!

Maraq üçün bildirək ki, Alessandro Del Pyero (497), Zlatan İbrahimoviç (496), Didye Droqba (481), Fernando Torres (477), Neymar (440), braziliyalı Ronaldo (414) və Tyerri Anri (411) kimi yaxın keçmişin önəmli ulduzları hətta bütün karyeraları ərzində belə 500 qol həddinə çatmayıblar!