Səudiyyə Ərəbistanı çempionatında mövsümə yekun vuruldu. ''Damak''ı minimal hesabla yenən çempion ''Əl-İttihad'', eləcə də səfərdə ''Əl-Fayha''ya iki cavabsız qol vuran Fatih Terimin ''Əl-Şabab''ı mövsümü qələbə ilə tamamladı.

Əsas diqqətlər 3-cü yer uğrunda mübarizəyə yönəlmişdi. Bu turdan öncə Kriştiano Ronaldonun şərəfini qoruduğu ''Əl-Nəssr''in aktivinə 3 xal əlavə olundu. Belə ki, fevralın 28-də bu komanda səfərdə ''Əl-Oruba''ya 1:2 uduzduqdan sonra federasiyaya şikayət etmişdi. Məlum olmuşdu ki, yerli komandanın qapısını qoruyan Rafi Əl Ruvaili cəzalı imiş və oynamaq hüququ yox imiş.

''Əl-Nəssr''in apellyasiyası qəbul olundu və komanda bu 3 xal sayəsində 3-cü pilləyə yüksəldi. Ər-Riyad təmsilçisi hətta 2-ci pilləni də tuta bilərdi. Bunun üçün ''Əl-Nəssr'' özü qalib gəlməli, 2-ci pillədəki ''Əl-Hilal'' isə evdə ''Əl-Qədsiyə''yə uduzmalı idi. Amma bu şərtlərin heç biri reallaşmadı. ''Əl-Hilal'' fanatları önündə 2:0 hesablı inamlı qələbə qazandı.

Bütün mövsümü qeyri-sabit keçirən ''Əl-Nəssr'' özü isə son turda da fanatlarını məyus etdi. Stefano Piolinin komandası ''Əl-Fateh'' ilə səfər oyununda iki dəfə hesabda öndə olmasına baxmayaraq sonda heç 1 xal da qazana bilmədi (2:3). Ronaldo bu qarşılaşmada aktivinə 1 qol yazdı. Bu, onun klub karyerasında yubiley - 800-cü, ümumilikdə isə peşəkar karyerasında 936-cı qol oldu.

Portuqaliyalı superulduz çempionatı 25 qolla tamamlayaraq ardıcıl 2-ci mövsümdə bombardir oldu. Onu 23 qolla Ayvan Toni və 21 qolla Kərim Benzema izlədi. Ancaq ''Əl-Nəssr'' yenə mövsümü titulsuz tamamladı və Ronaldo gəldiyi vaxtdan bu yana ilk dəfə ilk ''2-liy''ə düşə bilmədi.

Qeyd edək ki, ''Əl-Qədsiyə'' səfərdə ''Əl-Hilal''ı məğlub etsəydi, ''Əl-Nəssr'' heç 3-cü pilləni də tuta bilməyəcəkdi.