Dünən Səudiyyə Ərəbistanı çempionatında 31-ci tura yekun vuruldu.

“Football-plus.az” xəbər verir ki, inamla turnir cədvəlinə başçılıq edən ''Əl-Hilal'' öz meydanında ''Əl-Həzm''i 4:1 hesabı ilə darmadağın etdi. Görüşdə bütün qollar ilk yarıda vuruldu. Bununla da Jorje Jezuşun çalışdırdığı komanda çempionluğu rəsmiləşdirdi. Çünki sona 3 tur qalmış''Əl-Hilal'' ilə ən yaxın rəqibi - Kriştiano Ronaldonun şərəfini qoruduğu ''Əl-Nəsr'' arasında 12 xallıq fərq var. ''Əl-Hilal'' son 5 mövsümdə 4-cü, tarixinin isə 19-cu çempionluğunu qazandı. Jezuşun komandası demək olar, fenomenal bir mövsüm keçirdi və bir sıra rekordları alt-üst etdi. ''Əl-Hilal'' mövsümün gedişində ardıcıl 34 rəsmi oyunda qalib gəlməklə futbol tarixində bir ilkə imza atdı. Komanda çempionatda hələ də uduzmayıb və cəmi 2 oyunda xal itirib. 89 xal və 95 qol indidən çempionatın rekordudu. Baxmayaraq ki, mövsümün sonuna hələ 3 tur var. ''Əl-Hilal'' bu mövsüm çempionluqdan başqa ölkə superkubokunu da qazanıb. Mayın 31-də keçiriləcək ölkə kubokunun finalında isə rəqib ''Əl-Nəsr'' olacaq. Komanda yalnız Asiya Çempionlar Liqasında ümidləri doğrulda bilmədi və mübarizəni yarımfinalda dayandırdı. Jezuşa gəlincə, o, məşqçi karyerasının 24-cü titulunu qazandı. Maraqlıdı ki, Kriştiano Səudiyyə Ərəbistanında ikinci mövsümdə də çempion ola bilmədi.

ƏLİ