Deyəsən Türkiyə futbolunda yeni Arda Gülər yetişir.

"Football-plus.az" xəbər verir ki, Türkiyənin 3-cü liqa, yəni 4-cü divizion təmsilçisi ''Karşıyaka''da forma geyən 19 yaşlı Adəm Yeşilyurt son vaxtlar Türkiyə futbolunda ən çox müzakirə olunan gənc oyunçulardan biridi. Həm oyun tərzi, həm də solaxay olmasına görə Arda Gülərə bənzədilən 19 yaşlı futbolçu bu qış iki ciddi təklif aldı.

''Trabzonspor'' ona görə 600 min avro, səhmlərinin 74 faizi Acun Ilıcalıya məxsus olan Sloveniya təmsilçisi ''Maribor'' isə 750 min avro təklif etmişdi. Hətta ''Karşıyaka'' ilə ''Maribor'' arasında ilkin anlaşma da əldə olunmuşdu və gənc istedadın tezliklə Sloveniyaya yollanacağı gözlənilirdi. Amma son anda ''Fənərbaxça''nın araya girməsi ilə sürpriz yaşanıb.

Yağız Sabuncuoğlunun paylaşdığı məlumata görə ''Fənər'' prezidenti Sadəttin Saran özü şəxsən danışıqlarda iştirak edərək bu transferi tamamlayıb. ''Fənər'' İzmir klubu ilə 500 min avroya razılığa gəlib və bu məbləğ qarşı tərəfə iki hissəyə bölünərək ödəniləcək. Futbolçunun sonrakı satışından 25 faiz pay da ''Karşıyaka''ya çatacaq. Amma müqavilədə digər maraq doğuran maddələr də var.

Məsələn, yayda ''Fənər'' 3 gənc oyunçusunu ''Karşıyaka''ya icarəyə göndərəcək. Gələcəkdə bu 3 oyunçunun başqa kluba transferi reallaşsa, izmirlilərə 5 faiz pay veriləcək. Və nəhayət, ''Karşıyaka'' bu yay ''Fənər''ə məxsus məşhur ''Topuk Yaylası'' bazasında iki dəfə tamamilə pulsuz toplanış keçə biləcək. Əslində ''Karşıyaka'' özü də əlində belə istedadın olduğunun fərqinə varmamışdı. Adəm Yeşilyurt mövsümün əvvəlində demək olar, oynamırdı. Amma federasiya tərəfindən klubun 8 futbolçusuna oyunlara pul qoyuluşu etdiklərinə görə cəza verildikdən sonra ''Karşıyaka'' məcbur olaraq öz gənc yetirmələrinə şans verməli oldu. Adəm də dərhal öz oyunu ilə diqqət çəkməyə başladı.

İndiyə qədər 12 oyunda onun aktivində 2 qol, 2 məhsuldar ötürmə var. Artıq ''Fənər''in futbolçusu olmasına baxmayaraq Yeşilyurt mövsümün sonuna qədər icarə əsasında ''Karşıyaka''da forma geyməkdə davam edəcək. O, yeni klubuna yayda qoşulacaq.

Adəm həm də Türkiyənin U-19 yığmasının üzvüdü.