Gənc ulduzu Arda Güləri ''Real''a satan ''Fənərbaxça''nın bu futbolçunun yerinə kimi transfer edəcəyi maraq doğurur.

"Football-plus.az" xəbər verir ki, artıq hər gənc oyunçuya Ardanın davamçısı gözü ilə baxılacaq. Hələ ki, İstanbul nəhəngi ''altyapı''ya 2008-ci il təvəllüdlü Efe Konuşkanı cəlb edib. Oyun tərzi və texnikasına görə məhz Ardaya bənzədilən 15 yaşlı futbolçu İzmir təmsilçisi ''Bucaspor''un akademiyasında çıxış edirdi.

Xatırladaq ki, Arda Gülər də ''Fənər''ə 14 yaşında gəlmişdi. Amma rəhbərliyin əsas planı Kənan Yıldız ilə bağlıdı. ''Qazetta dello Sport''un xəbərinə İstanbul nəhəngi ''Yuventus''a məxsus olan 18 yaşlı istedadlı oyunçu üçün 10 milyon avro ödəməyə hazırdı! Amma ''Yuve'' rəhbərliyi böyük gələcək vəd edən futbolçunu satmaq istəmir. Qeyd edək ki, 2005-ci il təvəllüdlü yarımmüdafiəçi Almaniyada doğulub və 10 il ''Bavariya''nın akademiyasında top qovub. Kənan ötən yay Almaniyadan ayrılaraq ''Yuve'' ilə 2025-ci ilə qədər müqavilə imzaladı. Onun ayrılması Münhen nəhəngində böyük müzakirələrə səbəb olmuşdu. Kənan Yıldız ötən mövsümü ''Yuventus''un U-19 komandasında keçirdi. O, mövsümü 36 oyun, 14 qol, 7 məhsuldar ötürmə göstəriciləri ilə tamamladı. Universallığı ilə seçilən Kənan Türkiyənin U-21 yığmasının da üzvüdü.