Arda Gülər ''Fənərbaxça''nı ziyarət etdi

29.12.2024 10:52 279
Dünya futbolu
''Real''ın və Türkiyə yığmasının gənc ulduzu Arda Gülər La Liqada yaranmış fasilədən, eləcə də futbolçulara verilən bir neçə günlük istirahətdən istifadə edərək Türkiyəyə gəlib.

19 yaşlı yarımmüdafiəçi sabiq klubu ''Fənərbaxça''nı ziyarət edib. ''Can Bartu'' bazasına gələn Gülər oranın işçiləri, sabiq komanda yoldaşları, baş məşqçi Joze Mourinyo və klub prezidenti Əli Koç ilə görüşüb. 2021-23-cü illərdə ''Fənər''in şərəfini qorumuş Arda çəkilən şəkilləri ''instaqram''ın hekayə bölümündə paylaşaraq bunları yazıb:

''Bu ziyarətin mənim üçün mənası böyükdü. Qəlbimin bir parçası daim burdadı. Hər zaman yanımda olan ''Fənərbaxça'' ailəsinə sonsuz təşəkkürümü bildirirəm''.

Arda bu mövsüm ''Real''da 20 rəsmi oyunda 1 qol, 3 məhsuldar ötürmə ilə fərqlənib.

ƏLİ