Türkiyə çempionu “Qalatasaray” iki futbolçu ilə yollarını ayırıb.

"Football-plus.az" xəbər verir ki, bu ayrılıqlardan biri artıq klub tərəfindən rəsmən açıqlanıb. Söhbət Berkan Kutludan gedir.

27 yaşlı yarımmüdafiəçi öz səhifəsində vida paylaşımı edib. İsveçrədə doğulan və “Syon”un yetirməsi olan bu futbolçunun Türkiyədə ulduzu 2020/21-də “Alanyaspor”da parlamışdı. Növbəti mövsüm, yəni 2021-in yayında Berkan 4 milyon avroya “Qalatasaray”a transfer olundu. Ancaq o, “Cim-Bom”da heç bir dönəmdə əsas heyət üzvü sayılmadı. Okan Buruk həmişə ondan rotasiya oyunçusu kimi yararlanırdı. Berkanın ayrılmaq istəyinin əsas səbəbi də məhz budu.

Türkiyə yığmasında 8 oyun keçirən Kutlu ötən mövsümün ilk dövrəsini icarə əsasında “Cenoa”da keçirmiş və qışda Okan Burukun istəyi ilə yenidən “Qalatasaray”a qayıtmışdı. Berkan Kutlu “sarı-qırmızılar”da 159 rəsmi oyuna çıxaraq hesabına 3 qol, 8 məshuldar ötürmə yazdı və üçü çempionluq olmaqla 5 titul qazandı.

İstanbul nəhəngini tərk edəcəyi dəqiqələşən digər futbolçu Yusuf Dəmirdi. Onunla yolların ayrılacağını Okan Buruk da təsdiqləyib. Sadəcə, ayrılıq hələ rəsmi şəkildə baş tutmayıb. Çünki Dəmir və meneceri müqavilənin ləğvi üçün pul tələb edir. Rəhbərlik isə onlara 475 min avronu ödəmək istəmir. Yusuf Dəmiri Okan Burukun dönəmində “Qalatasaray”ın ən fiasko transferlərindən biri adlandırmaq olar. “Aslan” 2022-də 6 milyon avroya transfer etdiyi və dördillik müqavilə imzaladığı bu futbolçudan, demək olar, heç bir fayda görmədi.

2023/24 mövsümünü icarə əsasında “Bazel”də keçirən Yusuf “Qalatasaray” karyerasında cəmi 25 rəsmi oyuna çıxaraq hesabına 2 qol, 2 məhsuldar ötürmə yaza bildi. Bu arada ümidləri doğrultmayan daha bir futbolçu – Ahmed Kutucu da bu transfer dönəmində ayrıla bilər. Rəhbərlik ona 5 milyon avro qiymət qoyub və təklifləri gözləyir.

25 yaşlı futbolçu bu mövsüm 8 rəsmi oyuna çıxaraq yalnız 1 qol, 1 məhsuldar ötürmə ilə fərqlənib.