“Qalatasaray”ın Fredrik Midtşö ilə yollarını ayırdığını xəbər vermişdik.

"Football-plus.az" xəbər verir ki, norveçli futbolçu karyerasını superliqanın debütantı “Pendikspor”da davam etdirəcək. Srağagün Türkiyə çempionu daha bir oyunçu ilə yollarını ayırdı. Söhbət Berkan Kutludan gedir. Səssiz-sədasız şəkildə İtaliyaya yollanaraq tibbi müayinədən uğurla keçən yarımmüdafiəçi A seriyasının debütantı “Cenoa”ya keçib. Genuya təmsilçisi ilk mövsüm üçün bu futbolçunu 250 min avro qarşılığında icarəyə götürüb. Amma müqavilədə məcburi transferlə bağlı maddə var. “Cenoa” gələn yay daha 5 milyon avro ödəyərək Berkanla daimi əsasda müqavilə imzalayacaq. Bu məbləğ “Qalatasaray”a 2026-cı il iyunun 30-na qədər hissə-hissə ödəniləcək. Xatırladaq ki, “Qalatasaray” 25 yaşlı Berkanı 2021-in yayında 4 milyon avroya “Alanyaspor”dan transfer etmişdi. İlk mövsümdə əsas heyət üzvü sayılan Kutlu Okan Burukun gəlişindən sonra “11-lik”dəki yerini itirdi. Onun adı ÇL-də mövsümlük iştirak ərizəsinə salınmayacaqdı. Futbolçunun ayrılmasının səbəblərindən biri də məhz budu. Əsasən müdafiəyəmeyilli yarımmüdafiəçi kimi oynayan Berkan ümumilikdə “Cim-Bom”da 84 rəsmi rəsmi oyuna çıxaraq 1 qol, 5 məhsuldar ötürməlik fayda verdi.

Bu arada “Qalatasaray”lıların yolunu səbirsizliklə gözlədiyi Serxio Ramosun transferində problem yaranıb. Əslində bu keçid daha çox İstanbul nəhənginin Çempionlar Liqasının qrup mərhələsinə vəsiqə qazanıb-qazanmayacağından asılı idi. Komanda bu vəzifənin öhdəsindən gələrək üzərinə düşəni etdi. Ramosla illik 7,5 milyon avroluq maaş qarşılığında ilkin razılıq əldə olunmuşdu. Amma ortaya iki problem çıxıb. Birincisi, Ramosun meneceri olan qardaşı Rene “Qalatasaray”dan daha çox komissiya haqqı tələb edib. Rəhbərlik isə onun tələbini qətiyyətlə geri çevirib. İkinci problem odu ki, Ramos Səudiyyə Ərəbistanından, daha dəqiq desək, “Əl-İttihad”dan aldığı sərfəli təklifdən sonra tərəddüd yaşamağa başlayıb. Halbuki daha öncə onun yalnız Avropada karyerasını davam etdirmək istəyindən bəhs edilirdi. “Qalatasaray” Ramosa düşünmək üçün bu günün sonuna qədər vaxt verib. Düzdü, Türkiyədə Avropanın bir çox ölkələrindən fərqli yay “transfer pəncərəsi” sentyabrın 15-də bağlanacaq. Amma “sarı-qırmızılar” sentyabrın 5-nə qədər ÇL üçün iştirak ərizəsini UEFA-ya təqdim etməlidi. Bu üzdən Ramosu gözləməyə vaxt yoxdu. Bütün bunlar azmış kimi, Viktor Nelsson da hər an İstanbul nəhəngini tərk edə bilər. Bu baş verəcəyi təqdirdə müdafiə xəttində problemlər yaranacaq. Ona görə də “Qalatasaray” Serxio Ramosun qərarını mümkün qədər tez verməsini istəyir.