''Qalatasaray''ın üzvü Yusuf Dəmirə İspaniyadan çoxsaylı təkliflər var. 22 yaşlı vinger İstanbul nəhəngində əsas heyətə düşməkdə çətinlik çəksə də, ona ''Valensiya'', ''Osasuna'', ''Espanyol'', ''Xetafe'' və ''Elçe'' kimi La Liqa klubları ciddi maraq göstərir. ''Qalatasaray'' rəhbərliyi hələlik bu futbolçu ilə bağlı yekun qərarını verməyib və baş məşqçi Okan Burukun raportuna əsas addım atacaq.

Yusufun ''sarı-qırmızılar''la birillik müqaviləsi qalıb. Bəzi mənbələr iddia edir ki, Türkiyə çempionu Yusuf Dəmir ilə bu yay yeni müqavilə imzalamaq və onun satışından yaxşı gəlir əldə etmək istəyir. Bu da başa düşüləndi. Çünki ''Qalatasaray'' 2022-ci ildə bu futbolçunu 6 milyon avroya transfer edib. Yusuf Dəmirə məhz İspaniya klublarının maraq göstərməsi isə onun vaxtilə ''Barselona''da oynaması ilə əlaqəlidi. ''Rapid''in yetirməsi olan futbolçu 2021-ci ildə böyük ümidlərlə ''Barsa''ya transfer olunsa da, orda özünü yaxşı tərəfdən göstərə bilməmişdi.

Elə Türkiyədə də o hələ ki, istəniləni vermir. 2023/24-ü icarə əsasında ''Bazel''də keçirdikdən sonra Buruk ötən mövsüm onu komandada saxladı. Amma Dəmir yalnız 17 oyuna çıxaraq aktivinə 2 qol, 2 məhsuldar ötürmə yaza bildi. Ona görə də ''Qalatasaray''ın bu yay onunla vidalaşması sürpriz olmayacaq.