Fernando Muslera ilə vidalaşan ''Qalatasaray''da yüksək səviyyəli qapıçı axtarışı davam edir.

"Football-plus.az" xəbər verir ki, İstanbul nəhəngi ilk növbədə əcnəbi qapıçı gətirmək istəyir. Klubun gündəmində olan 3 əsas qapıçı artıq bəllidi.

Siyahının birinci pilləsində ''Real''ın ukraynalı üzvü Andrey Lunin, ikinci pilləsində uzun illərdən sonra bu yay ''Atletiko''nu tərk etmək ehtimalı yaranan Yan Oblak qərarlaşıb. 3-cü qapıçı isə ''Trabzonspor'' və Türkiyə yığmasının üzvü Uğurcan Çakırdı. 29 yaşlı əlcək sahibi ''sarı-qırmızılar''ın gündəmində yer alan yeganə yerli qapıçıdı. Ancaq ''Trabzonspor'' öz yetirməsi və kapitanını təbii ki, asanlıqla əldən buraxmaq niyyətində deyil. Qış transfer dönəmində Ərən Elmalının ''Trabzonspor''dan ''Qalatasaray''a keçidi zamanı bu iki klub arasında yaxşı münasibətlər yaranmışdı. Ona görə də Çakırın transfer durumu ciddiləşsə, klub prezidentlərinin görüşərək məsələni həll etməyə çalışacaqları gözlənilir.

İddialara görə ''Trabzonspor'' Uğurcanın əvəzinə ''Qalatasaray''dan 3 futbolçu tələb edir. Söhbət Xəlil Dərvişoğlu, Berkan Kutlu və Kərəm Dəmirbaydan gedir. Hətta deyilənə görə trabzonluların çalışdırıcısı Fatih Təkkə artıq Dərvişoğlu ilə danışaraq onu Trabzona dəvət edib. Bu futbolçu zatən geridə qoyduğumuz mövsümü icarə əsasında ''Qaziantep''də keçirmişdi. Yəni onun ayrılması ''Cim-Bom'' üçün faciə olmayacaq. Amma Berkan ilə Kərəm əsas heyət üzvü olmasalar da, tez-tez rotasiyada istifadə edilirlər. Ona görə də Okan Burukun onları buraxmağa razı olub-olmayacağı bilinmir. Hələlik ''Qalatasaray'' diqqətini Lunin ilə Oblaka yönəldib.

Bu qapıçıların keçidi həll olunmasa, o zaman Türkiyə çempionu diqqətini Uğurcana yönəldəcək.