Türkiyənin son çempionu “Qalatasaray” iki futbolçu ilə yollarını ayırıb.

"Football-plus.az" xəbər verir ki, söhbət qapıçı Okan Kocukla sol müdafiəçi Əmrə Taşdəmirdən gedir. Amma bunu ciddi itki saymaq olmaz. Çünki bu oyunçular əsas heyət üzvü sayılmırdı.

“Bursaspor”un yetirməsi sayılan Okan Kocuk 2019-dan “Qalatasaray”da idi. O, geridə qalan 4 mövsümdən 3-nü İstanbul nəhəngində, 1-ni (2021/22) isə icarə əsasında “Girəsunspor”da keçirdi. 27 yaşlı qapıçı “sarı-qırmızılar”da cəmi 29 rəsmi oyuna çıxa bildi. Okan Kocuk yeni mövsümdə “Samsunspor”un şərəfini qoruyacaq. O, superliqanın debütantı ilə üçillik müqavilə imzalayıb. Qapıçı mövzusundan söz düşmüşkən, onu da bildirək ki, “Aslan” “Trabzonspor”un və Türkiyə yığmasının qapıçısı Uğurcan Çakırı heyətinə qatmağa çalışır. Onun keçidi baş tutsa, Fernando Muslera gələn mövsüm 2-ci qapıçı statusuna keçəcək.

Əmrə Taşdəmir isə 2018/19-un qış fasiləsində “Bursaspor”dan transfer edilmişdi. O, 2019/20-nin ikinci dövrəsini icarə əsasında “Kayserispor”da, 2021/22-ni isə “Girəsunspor”da keçirmişdi. Əsas heyətə düşməkdə çətinlik çəkən 27 yaşlı futbolçu geridə qoyduğumuz mövsüm superliqada 5 oyuna çıxaraq 1 qol vurdu. Amma həmin qol çox vacib qol oldu. 12-ci turda “Qalatasaray” “Fatih Karagümrük”lə səfər oyununda uzun müddət rəqib müdafiəsini yara bilmirdi. 60-cı dəqiqədə məhz Əmrə Taşdəmir vurduğu qolla qələbənin əsasını qoydu və Okan Burukun komandası yekunda 2:0-lıq qələbə qazandı. Ümumilikdə solaxay futbolçu “Qalatasaray”da 2-si çempionluq olmaqla 4 titul qazandı və 37 rəsmi oyuna çıxaraq 1 qol, 7 məhsuldar ötürməlik performans sərgilədi. Onun yeni klubu hələ ki bəlli deyil. “Qalatasaray”ın maraq göstərdiyi hücumçuların sırasına ÇSKA-nın üzvü Fyodor Çalov da qoşulub. Klub rəsmiləri artıq 25 yaşlı hücumçunun meneceri ilə əlaqə saxlayaraq onun təzminatı ilə maraqlanıblar. İstanbul nəhəngi Çalova ikinci hücumçu gözü ilə baxır. Geridə qoyduğumuz mövsümdə bu futbolçu “hərbçilər”in heyətində 41 rəsmi oyunda 24 qol, 5 məhsuldar ötürməlik diqqətçəkən performans sərgiləyib.

Bu arada “Qalatasaray”ın Avstriya toplanışında rəqiblərindən birinin adı bəlli olub. “Cim-Bom” artıq gələn həftə, daha dəqiq desək, iyunun 27-də hazırlığa start verəcək. Komanda iyulun 8-də Avstriyaya yollanacaq. Burda isə iyulun 18-də “Şturm”la qarşılaşacaq. “Sarı-qırmızılar” bu toplanış zamanı ümumilikdə 3 oyun keçirəcək. Digər iki rəqibin adına daha sonra aydınlıq gələcək. Xatırladaq ki, “Qalatasaray” ötən yay da Avstriya toplanışında “Şturm”la qarşılaşmış və 1:2 hesabı ilə məğlub olmuşdu.