Ötən il olduğu kimi, bu il də “FİFA series-Editon” turnirinə evsahibliyi edəcək ölkələrdən biri Azərbaycan olacaq. Milli komanda martda keçirilən turnirdə Oman, Syerra-Leone, Sent-Lusiya yığmaları ilə qarşılaşacaq.

Belə turnirlər Azərbaycana nə qazandırır? Bunun yığmamıza nəsə bir xeyri varmı? Görünmür. Rəqiblər isə Azərbaycan millisindən səviyyə baxımından heç də yüksək olmayan komandalardı. Belə turnirləri qəbul etməkdə məqsəd və hədəf nədi - bilinmir.

Ötən il Bolqarıstan və Monqolustan yığmalarına qarşı oynamışdıq. Bolqarıstanla 1:1 hesablı heç-heçəyə razılaşan millimiz Monqolustanı 90+1-ci dəqiqədə Bəhlul Mustafazadənin vurduğu qolla 1:0 hesabıyla məğlub etmişdi. Amma martda qarşılaşacağımız yığmalar hara, Bolqarıstan hara?
Bu turnirə futbolçular da həvəssiz yanaşır. Normaldı. Heç bir nüfuzu olmayan turnir üçün niyə can qoysunlar ki? O başqa məsələ ki, azərbaycanlı futbolçuların istəyini, fədakarlığını heç rəsmi oyunlarda da görmürük.

Turnir Ayxan Abbasov üçün də vaxt itkisi olacaq. Düzdü, bəlkə də qələbələr olsa, komandada müəyyən özünəinam yarana bilər. Amma rəqiblər elə millilərdi ki, qələbələr olsa da, heç kim nə futbolçuları, nə də baş məşqçini alqışlayan deyil. Olan yenə “Şamaxı”ya olacaq...

Qeyd edək ki, futbolçularının 6,43 milyon avro “transfermarkt” dəyəri olan Oman FİFA reytinqində 79-cu, 9,60 milyon dəyərə malik Syerra-Leone 121-ci pillələdi. 167-ci pillədə qərarlaşan Sent-Lusiyanın futbolçuları isə 500 min avro dəyərə malikdi.

Xatırladaq ki, 18 milyon avro “transfermarkt” dəyəri olan millimiz FİFA reytinqində 127-ci yerdədi. Yəni nə qədər yuxarıdan aşağı baxsaq da, bu millilərin ikisi FİFA reytinqində bizi üstələyir.

MÜZƏFFƏR QULUZADƏ