Rəsmi yoldaşlıq oyunlarının əvəzinə fərqli konfederasiyalardan yığmaların iştirakı ilə miniturnir təşkil olunacaq. Dörd komandanın – yığmamızla yanaşı, Bolqarıstan, Monqolustan və Tanzaniyanın qatılacağı yarışın martda Bakıda keçirilməsi nəzərdə tutulub. Bəs görəsən, oyun günləri bəllidimi? Bu sualı AFFA-nın Mətbuat və İctimaiyyətlə Əlaqələr departamentinin rəhbəri Elnur Məmmədliyə ünvanlamamış PFL-in cari mövsüm üçün təqdiminə nəzər saldıq. Gördük ki, ölkə çempionatında 27-ci turla 28-ci tur arasında ikihəftəlik fasilə var. İndi də Elnur bəyin “Football-plus.az”a cavabı ilə tanış olun:
"Turnir FİFA-nın “pəncərəsi açılandan” sonra olacaq. Martın 22-də başlayıb, 25, 26-na qədər davam edəcək. Ola bilər ki, iştirak edən komandalar Bakıya bir qədər tez gəlib, burda təlim-məşq toplanışı keçsin. Oyunların saatı, stadionların yeri dəqiqləşən kimi ətraflı məlumat verəcəyik".
GÜNAY SÜLEYMANOVA
