“Football-plus.az” turnirin formatı ilə bağlı bilgi əldə edib. Belə ki, martın 4-cü həftəsində Azərbaycan, Bolqarıstan, Monqolustan və Tanzaniya yığmalarını iştirakı ilə keçiriləcək turnir də olimpiya, nə də İsveçrə sistemi ilə olacaq. İştirakçıların heç də hamısı bir-biri ilə oynayamayacaq. Bizə çatan bilgiyə görə, oyunlar Bakı Olimpiya Stadionunda keçiriləcək. İnformasiyanı dəqiqləşdirmək üçün AFFA-nın Mətbuat və İctimaiyyətlə Əlaqələr Departamentinin rəhbəri Elnur Məmmədli ilə əlaqə saxladıq:
“Əvvəl biz də bunu turnir kimi bilirdik. Amma belə deyilmiş. Bu, yalnız yoldaşlıq oyunlarını əvəz etmək üçün FİFA-nın irəli sürdüyü layihədi. Azərbaycan, Monqolustan, Bolqarıstan Tanzaniyanın seçilməsinə gəlincə, bu komandalar FİFA reytinqində bir-birinə yaxındı. Azərbaycan birinci Bolqarıstanla, sonra Monqolustanla oynayacaq, Tanzaniya ilə oyun olmayacaq. Yəni udan udanla, uduzan uduzanla oynamayacaq. Bunlar, sadəcə, iki yoldaşlıq oyunudu. Martın 22-si və 25-də keçiriləcək. BOS variantina gəlincə, hələ dəqiq deyil. Çünki martın 22-də U-21 millimizin İngiltərə ilə oyunu var. Doğrudu, həmin oyunun Suraxanıda - “Qarabağ”ın stadionunda keçiriləcəyi dəqiqdi. Sadəcə, millinin oyunlarıyla bağlı bir-iki məsələ qalıb ki, yerin dəqiqləşməsi də bura daxildi. Sonda medal və ya kubok verilməsi nəzərdə tutulmayıb. AFFA-nın planı belə idi ki, martda Bolqarıstanla səfərdə yoldaşlıq oyunu keçirək. Sonra FİFA ortaya belə ideya qody. Məqsədləri də odu ki, müxtəlif qitələrdən olan yığma komandalar bir-biriylə oynasınlar”.
KAMAL SƏFƏR
