Türkiyə futbolundan istefa xəbərləri gəlməkdə davam edir. Şota Arveladzenin ''Kasımpaşa'' macərası başa çatıb.

"Football-plus.az" xəbər verir ki, son turda evdə ''İstanbul BŞ''yə 1:3 məğlub olan ''Kasımpaşa'' gürcüstanlı mütəxəssislə yollarını ayırmağa qərar verib.

Bu, 52 yaşlı Arveladzenin İstanbul klubundakı ikinci dönəmi idi. O daha öncə məşqçi karyerasının əvvəllərində - 2012-15-ci illərdə bu klubda çalışmışdı. ''Kasımpaşa'' bu mövsüm ''Beşiktaş'' və ''Fənərbaxça''dan xal almağı bacarsa da, ümumilikdə zəif təsir bağışlayır. 14 tura cəmi 3 qələbəsi olan bu kollektiv 14-cü pillədə qərarlaşıb. Üstəlik ''Kasımpaşa'' kubokda da həvəskar komandaya uduzaraq mübarizəni dayandırıb.

Türkiyə mətbuatının yazdığına inansaq, vaxt itirmək istəməyən rəhbərlik dərhal Əmrə Belözoğluya təklif irəli sürüb. İlk danışıqlar uğurlu keçib və Belözoğlu özü də bu klubun başına keçməkdə maraqlıdı. Rəsmi açıqlamanın qısa müddətdə veriləcəyi gözlənilir. 45 yaşlı mütəxəssis son olaraq ötən mövsümdən bu yana ''Antalyaspor''u çalışdırmış və 8-ci turda istefa vermişdi.