Türkiyə çempionatı həqiqətən də Avropanın ən qəribə turnirlərindən biridi.

Burda məşqçiləri tək uğursuz nəticələrdən sonra yox, hətta qələbədən sonra da qovurlar! Srağagün superliqadan şok istefa xəbəri gəldi. Belə ki, “Kasımpaşa” Samu Uğurlu ilə qarşılıqlı şəkildə anlaşaraq yolların ayrıldığını açıqladı. Bu istefaya məntiqli izah tapmaq çətindi. Çünki “Kasımpaşa” turnir cədvəlində orta pillələrdədi. Ən əsası İstanbul təmsilçisi son turda səfərdə “Beşiktaş” üzərində 3:1 hesablı inamlı qələbə qazanaraq mövsümün ən böyük sürprizlərindən birini reallaşdırmışdı. Hətta Samu Uğurlu “Beşiktaş”la oyunlarda ardıcıl 4 qələbə qazanan ilk məşqçi kimi superliqa tarixinə düşmüşdü. Görünür, rəhbərliklə məşqçi arasında müəyyən fikir ayrılığı yaşanıb. Çünki nəticə baxımından məşqçini qovmaq üçün heç bir əsas yox idi. Maraqlıdı ki, Samu Uğurlu superliqa tarixində Fatih Terimdən sonra “Beşiktaş” üzərində səfər qələbəsinin ardından istefaya göndərilən ikinci mütəxəssis oldu.

Terim bu aqibətlə 2013-ün sentyabrında “Qalatasaray”da işləyərkən üzləşmişdi. Həmin vaxt “İmperator” o dönəmdəki başqan Ünal Aysalla problem yaşamış və onun əvəzinə baş məşqçi postuna Roberto Mançini gətirilmişdi. Bununla da cari mövsüm Türkiyə çempionatında istefaların sayı 9-a çatdı. Bu, Sami Uğurlunun “Kasımpaşa”dakı ikinci dönəmi idi. O daha öncə 2021-in dekabrından 2022-nin avqustuna qədər bu klubda çalışmışdı. Onun ikinci dönəmi isə ötən ilin noyabrında başlamışdı. “Kasımpaşa” ümumilikdə bu iki dönəmdə Uğurlu ilə 62 rəsmi oyundan 29 qələbə, 13 heç-heçə, 20 məğlubiyyətlə ayrılmış oldu. Amma 46 yaşlı mütəxəssisin işsiz günləri çox çəkmədi. Türkiyə mətbuatının iddiası doğru çıxdı və Uğurlu “Alanyaspor”la ilyarımlıq müqavilə imzaladı.

“Alanyaspor” bir neçə gün öncə Fatih Təkkə ilə yoillarını ayırmışdı. “Kasımpaşa”nın isə yeni çalışdırıcısının kim olacağı hələlik bəlli deyil.