Türkiyə çempionatında növbəti məşqçi təyinatı reallaşıb.

"Football-plus.az" xəbər verir ki, məşqçiləri dəyişməyi sevən klublardan olan “Kasımpaşa”nın yeni baş məşqçisinin adına aydınlıq gəlib.

İstanbul klubunu ən son Səlcuk İnan çalışdırırdı. Amma ilk müstəqil məşqçilik təcrübəsini məhz bu klubda yaşayan İnanın dönəmi cəmi 85 gün davam etmiş və o, martın 18-də rəhbərliklə qarşılıqlı şəkildə anlaşaraq ayrılmışdı. 26 oyuna topladığı 29 xalla 11-ci pillədə qərarlaşan “Kasımpaşa”nı mövsümün qalan hissəsində Kamal Özdəş çalışdıracaq. Bu, 52 yaşlı mütəxəssisin “Kasımpaşa”da 3-cü dönəmi olacaq. O daha öncə bu klubda 2016-nın sentyabrından 2018-in oktyabrına və 2019-cu ildə iyundan dekabra qədər çalışmışdı.

Özdəş ən son 2020-nin martında “Yeni Malatyaspor”dan ayrılandan bəri heç bir klubu çalışdırmamışdı. İndiyə qədər “Kasımpaşa” onun rəhbərliyi altında keçirdiyi 101 rəsmi oyundan 43 qələbə, 17 heç-heçə, 41 məğlubiyyətlə ayrılıb. Onu da bildirək ki, Özdəş cari mövsümdə “Kasımpaşa”nı çalışdıran 4-cü mürəxəssis olacaq. İstanbul klubu mövsümə Sami Uğurlu ilə başlamış, daha sonra Şenol Can və Səlcuk İnan ilə yoluna davam etmişdi. “Kasımpaşa”nın həftəsonu öz meydanında “Trabzonspor” ilə qarşılaşacağını da xatırladaq.