''Fənər''in sabiq üzvü derbiyə aid paylaşım etdi - fanatlar onun cəzalanmasını istədi
Bazar ertəsi bütün Türkiyənin böyük maraqla izlədiyi derbidə qalib müəyyənləşmədi.
"Football-plus.az" xəbər verir ki, ''Fənərbaxça''nın doğma meydanda ''Qalatasaray''ı qəbul etdiyi oyunu tribunadan izləyənlər arasında Sərdar Dursun da var idi.
Təcrübəli forvard iki fərqli dönəmdə ''Fənər''in şərəfini qoruyub. Hətta ''sarı-lacivərdlilər''in əzəli rəqibini evdə sonuncu dəfə məğlub etdiyi oyunda, daha dəqiq desək 2022-ci ilin aprelin 10-da baş tutan derbidə (2:0) yekun nəticəni məhz bu futbolçu müəyyənləşdirmişdi. Ona görə də Sərdarın ''Fənər''ə olan sevgisi başa düşüləndi.
O, son derbidə tribunadan bəzi şəkillər, eləcə də yerli fanatların yaratdığı performansı çəkərək öz ''instaqram'' hesabında paylaşdı. Ancaq məsələ burasındadı ki, 34 yaşlı forvard hazırda superliqanın başqa bir klubu - ''Kocaelispor''un şərəfini qoruyur. Hətta son turda o, komandasının qələbə qolunun da müəllifi olub. Ona görə də bəzi futbolsevərlər, xüsusilə də ''Kocaelispor'' fanatları Dursunun hərəkətini etik cəhətdən xoş qarşılamayıb və onu qeyri-peşəkarlıqda günahlandırıb. Etirazların artdığını görən futbolçu derbi ilə bağlı paylaşımlarını silməli olub. Bəziləri ''Kocaelispor'' rəhbərliyinin ona cəza verməsini tələb edir.
Bu arada debütantın prezidenti Rəcəp Durul məsələyə münasibət bildirib. O, futbolçuya cəza verilməyəcəyini bildirib:
''Həmin gün bizim futbolçular üçün sərbəst gün idi. Bir oyunu stadiondan izləməklə televizor qarşısında izləmək arasında fərq yoxdu. Sərdar ''Fənər''in keçmiş futbolçusudu və bunu da gizlətmir. Ancaq ''Kocaelispor'' üçün meydanda var gücü ilə mübarizə aparmasına dair heç bir şübhəmiz yoxdu. Necə oynadığını da hər kəs görür. Bu komanda üçün savaşan futbolçudan bəhs edirik. Ona görə də bir paylaşıma görə bu cür futbolçunu itirmək istəmirəm. Səhvə yol veribsə, bura gəldikdən sonra onunla danışacağıq. Lazım olsa, üzr də istəyəcək. Cəza alması və ya komandadan kənarlaşdırılması mövzusunu heç müzakirə etməyə də ehtiyac yoxdu. Onun yeganə səhvi derbiyə aid paylaşım etməsidi ki, zatən sonradan bunun fərqinə vararaq həmin şəkilləri sildi. Bu məsələni uzatmağa ehtiyac görmürəm. Sərdar bütün diqqətini ''Kocaelispor''un uğur qazanmasına yönəldib. Digər klubların fanatlarının istəyi ilə hərəkət etməyəcəyik. Biz futbolçumuza inanırıq. Sərdar da bundan sonra formasını geydiyi klubun məsuliyyətini dərk edərək hərəkət edəcək''.
Digər xəbərlər
