"İmişli" Misli premyer-liqasının 13-cü tur matçında "Sabah"a uduzdu - 0:3.

"Football-plus.az" xəbər verir ki, "pələnglər"in baş məşqçisi Jorj Kaşkilya oyunsonrası mətbuat konfransında jurnalistlərin suallarını cavablandırıb.

- Oyun çox çətin keçdi. Evdə uduzduğumuza görə məyusuq. Matça "Sabah" yaxşı başladı. Daha sonra oyunu bərabərləşdirməyi bacardıq. Hətta qol da vurduq. Bizim düşüncəmizə görə ofsayd yox idi. Amma VAR fərqli qərar verdi. İlk dəfə deyil ki, belə hallarda VAR bizim əleyhimizə qərar verir. İkinci hissədə ilk qola qədər bərabər oyun gedirdi. Futbolçular məğlub duruma düşdükdən sonra qol vurmaq üçün çox çalışdılar. Yaxşı şanslarımız olsa da, qol vura bilmədik. Rəqibi təbrik edirəm.

- Növbəti matçınız da kubokda "Sabah"a qarşıdı. Qısa müddətdə nəyi dəyişməyi düşünürsüz?
- Eyni qaydada məşqlərimizə davam edəcəyik. Bu gün komandam yaxşı oyun nümayiş etdirdi. Qısa müddətdə iki matç olduğu üçün heyətdə bir neçə dəyişiklik olacaq. Çünki bərpa prosesi vacibdi. "Sumqayıt"la çempionat oyununu da düşünməliyik.

- "Sabah"ın baş məşqçisi bildirdi ki, bu stadion premyer-liqa səviyyəsində deyil. Siz necə düşünürsüz?
- Həmkarımın sözlərinə hörmətlə yanaşıram. Bura bizim ev oyunlarını keçirdiyimiz stadiondu. Baxın görün biz evdə və səfərdə necə oynayırıq.

- "Neftçi" üzərindəki qələbədən sonra bu gün "Sabah"a böyük hesabla uduzduz. Meydança amilinin oyununuza təsiri oldu?
- Meydançadan çox rəqibimizi daha çox düşünürük. "Sabah"ın premyer-liqada bir məğlubiyyəti var, o da bizimlə oyunda. Bu matça da qələbə üçün çıxmışdıq. Meydan barədə heç nə deməyəcəm. Çünki futbolda əsas olan taktiki yanaşmadı.

- Bu gün 10 legionerlə meydana çıxmışdız. Əlinizdə imkan olsa, Azər Salahlının yerinə də əcnəbi futbolçu oynadardız?
- Azər bizim kapitanımızdı, komanda üçün çox vacib oyunçudu. Bu gün səhv etməsi heç nəyi dəyişmir. Bu, futboldu, səhvlər olur. Əcnəbi futbolçular da səhv edir.