Misli premyer-liqasında 10-cu turun açılış matçında “İmişli” “Qarabağ” səfərindən əliboş qayıtdı - 2:0.

“İmişli”nin baş məşqçisi Jorj Kaşkilya oyundan sonra media önünə çıxdı.

- Oyunçularımla fəxr edirəm. Səviyyəli futbol oynadıq. İlk hissədə taktiki cəhətdən fantastik oynadıq. Yaxşı hazırlaşmışdıq. Rəqibin keyfiyyətli futbolçuları var. İki böyük şansımız oldu. Təəssüf ki, yararlana bilmədik. İkinci hissədə aydın idi ki, “Qarabağ” təzyiq edəcək. Taktiki dəyişiklik etdik ki, hesabı bərabərləşdirək. Məğlub olduğumuza görə məyusuq. “Qarabağ”a qarşı belə oynamaq bizim üçün uğurdu.

- Penaltini niyə Almeyda yox, Juninyo yerinə yetirdi?
- Mənim qərarım idi. Son oyunda da o vurmuşdu. Özünəinamı artırır.

- Yau Mozes artıq ehtiyatda qalır. Bu taktiki gedişdi, yoxsa forma mübarizəsində İdrislə Abbasa uduzur?
- Mozesin zədəsi var idi. Müalicə alırdı. Fiziki baxımdan 90 dəqiqə oynamağa hazır deyil.

- Axı “Kəpəz”lə oyuna start heyətində başlamışdı.
- Bu da taktiki qərar idi. “Kəpəz”lə oyunda oynamağa fiziki gücü çatırdı. Lakin bu oyuna tam hazır deyildi.

- Matç Qubada olsaydı, nəticə fərqli ola bilərdi?
- Bu haqda heç nə deməyəcəm.

- Axı Qubada meydan sahibi olacaqdız.
- Mən məşqçiyəm. Rəhbərlik kömək etmək istədi. Biz qonaq komanda kimi 4 oyundan 3-də qələbə qazanmışıq. Azarkeşlər Qubada necədisə, burda da elədi. Elə də fərq etmir.

- 7-ci pillə sizi qane edir?
- Həmişə döyüşürük. 15 xalımız olmalıdı. Amma tam qane olmuruq. Daha çoxunu istəyirik.

MÜZƏFFƏR QULUZADƏ