"İmişli" Misli premyer-liqasının 7-ci tur matçında "Araz-Naxçıvan"ın meydanından məğlub ayrıldı - 0:2.

"Football-plus.az" xəbər verir ki, "pələnglər"in baş məşqçisi Jorj Kaşkilya media nümayəndələrinin suallarını cavabladı.

- Hər iki komanda çox çətin və keyfiyyətli oyun keçirdi. "Araz-Naxçıvan" avrokubok təcrübəsi olan komandadı. Buna baxmayaraq, çox yaxşı oyun göstərdik. Rəqib birinci hissədə qol vurdu. Buna baxmayaraq, fasilədə komandaya motivasiya verdik. İkinci yarıda penaltini dəyərləndirə bilmədik. Meydanda bərabərsəviyyəli oyunun getdiyini düşünürəm. Onu deyim ki, xüsusilə, ikinci hissədə hücumlarda daha çox vaxt keçirdik.

- İkinci hissədə xeyli dəyişiklik etdiz. Sanki bütün futbolçuları meydana buraxmaq istəyirdiz...
- Bu normal haldı. Çünki uduzurduq. Belədə meydana hücumameyilli futbolçular buraxdıq.

- Penaltinin dəqiq yerinə yetirilməməsi sizi narahat edirmi?
- Hər oyunçuyla bu barədə fərdi söhbət edirik, onları oyunlara hazırlayırıq. Futbolçuların təkcə penalti epizodlarına yox, bütün oyun elementlərinə hazır olmasını istəyirik və bu yöndə çox çalışırıq.

- "Şamaxı"yla matçdan sonra hakimlikdən narazı qalmışdız. Bu gün top sizdə olanda hakim əvəzetmələr üçün oyunu dayandırdı və bu qərar texniki zonanızda kəskin etirazla qarşılandı. Bu gün də hakimlikdən narazısızmı?
- Xeyr, bu gün hakimin idarəçiliyindən razı qaldım.

- Adətən, uğurlu seriyalar pozulandan sonra komandada ruh düşkünlüyü yaranır. Bunun qarşısını necə alacaqsız?
- Məğlub olmaq da futbolun bir hissəsidi. Bu gün uduzduq. Ancaq "Araz-Naxçıvan" kimi rəqibə qarşı bərabərsəviyyəli oyun göstərdik. Komandamın motivasiya yerindədi. Məğlubiyyət bizə mənfi təsir etməyəcək. Futbolçularımdan razı qaldım. Bu arada, uzun məsafə qət edib bura gələn azarkeşlərə təşəkkür edirəm. Xahiş edirəm, bizə dəstək olmağa davam etsinlər. Onların varlığı bizim üçün çox vacibdi.

KƏNAN BAHADIR