Məşqçi karyerasında ölkə çempionluğu olmayan Domeniko Tedeskonun uzun illərdi çempionluq həsrəti çəkən və Joze Mourinyonun dönəmində psixoloji cəhətdən dibə vuran ''Fənərbaxça''nı bu qədər qısa müddətdə dirçəldəcəyini az adam proqnozlaşdırardı.

"Football-plus.az" xəbər verir ki, italyanəsilli almaniyalı mütəxəssis hələ ki, işinin öhdəsindən əla gəlir. ''Fənər'' Türkiyə çempionatında uduzmayan yeganə komanda statusundadı və həftəsonu ''Qalatasaray''ı da məğlub edəcəyi təqdirdə uzun müddətdən sonra ilk dəfə liderliyə yüksələcək. Xüsusilə son iki səfər oyununda ''Fənər'' Tedeskonun əvəzetmələri sayəsində mühüm geridönüşlərə imza atdı.

Bu arada 40 yaşlı çalışdırıcı İstanbul nəhənginin başında ilk 10 superliqa matçından 7 qələbə, 3 heç-heçə ilə ayrılaraq 24 xal toplayıb ki, bu da orta hesabla hər oyuna 2,4 xal deməkdi. Tedesko bu göstərici ilə hətta İsmayıl Kartalı da geridə qoyub.

2023/24-də ''Fənər''in başında tarixi göstəricilər yaxalamasına baxmayaraq çempion ola bilməyən Kartal bu klubda orta hesabla hər oyuna 2,38 xal toplayıb. Tedesko hazırda bu göstəricidə klub tarixində ikinci pillədə qərarlaşıb. Lider isə 1995/96-da ''Fənər''i çalışdırmış və hər oyuna orta hesabla 2,47 xal toplamış Karlos Alberto Parreyradı. İsmayıl Kartal 3-cü pillədədi.

Digər pillələrdə İqnaçe Molnar (2,37), Joze Mourinyo (2,32), Kristof Daum (2,29) və Jorje Jezuş (2,24) qərarlaşıb.