''Fənərbaxça'' üçün ilk dövrə ''Konyaspor'' üzərində səfər qələbəsi ilə başa çatdı.

''Football-plus.az'' xəbər verir ki, bu mövsüm superliqada 19 kollektiv çıxış etdiyindən komandalar ilk dövrədə 18 oyun keçirir. Ona görə də 18-ci turlar etibarilə Joze Mourinyo ilə ötən mövsüm ''Fənər''in başında yer alan İsmayıl Kartalın göstəricilərini müqayisə etmək yerinə düşər. İstanbul nəhəngi bu mövsüm 18 oyundan 13 qələbə, 3 heç-heçə, 2 məğlubiyyətlə ayrılaraq 42 xal toplayıb. ''Sarı-lacivərdlilər'' 45 qol vurduqları halda öz qapılarından 18 top buraxıblar. Ən əsası komanda ilk dövrədə evdə ''Qalatasaray''a 1:3 hesabı ilə məğlub oldu və hazırda lider olan əzəli rəqibindən 8 xal geridədi.

Kartalın ''Fənər''i isə ötən mövsüm 18-ci turu 15 qələbə, 2 heç-heçə, 1 məğlubiyyətlə tamamlamışdı. Komanda ilk dövrədə evdə ''Qalatasaray''la qolsuz bərabərliyə qalmışdı. 18-ci turdan sonra hər iki nəhəngin aktivində 47 xal var idi və ''Fənər'' topların daha yaxşı fərqinə görə lider idi. Kartalın komandası eyni dönəmdə 49 qol vurmuş və qapısından 15 top buraxmışdı. Başqa sözlə desək Kartalın ''Fənərbaxça''sı Mourinyonun ''Fənərbaxça''sından bütün göstəricilərdə üstündü!

Bu mövzunu onların maaşlarını müqayisə etmədən tamamlamaq olmaz. Mourinyonun illik qazancı 10,5 milyon avrodusa, Kartal ''Fənər''də cəmi 1 milyon avro qazanırdı!

ƏLİ