Okan Buruk bəzən nəinki fanatlar, hətta idarə heyətində də müzakirə mövzusu olmasına baxmayaraq, “Qalatasaray”da tarix yazmaqda davam edir.

Son iki ildə “Cim-Bom”u çempion edən 51 yaşlı mütəxəssis bu mövsüm də nəticələri ilə diqqəti çəkir. Komandanın superkubokda “Beşiktaş”a 0:5 hesabı ilə uduzmasına, eləcə də “Yanq Boyz”a hər iki oyunda məğlub olaraq Çempionlar Liqasından kənarda qalmasına baxmayaraq, Buruk ən önəmli məsələdə, yəni daxili çempionatda komandanı ayaqda saxlamağı bacarır.

“Qalatasaray” hazırda yığma fasiləsinə ən yaxın rəqibindən 4 xal öndə olmaqla lider qismində yollanıb. Okan Burukun son 2,5 il ərzində qazandığı uğurlar rəqəmlərdə də əksini tapır. Buruk hətta klub tarixinin əfsanəsi Fatih Terimi də geridə qoymağı bacarıb. Türkiyə mətbuatındaki mənbələrə əsaslansaq, Buruk “Qalatasaray”ın başında 108 rəsmi oyuna çıxıb və komanda bunların 81-dən qələbə ilə ayrılıb. “Sarı-qırmızılar” bu məşqçi ilə oyunların 75 faizində qalib gəliblər və orta hesabla hər oyuna 2,36 xal toplayıblar. Terimin ilk 108 oyununda isə “Qalatasaray” yalnız 73 qələbə qazanıb.

Yəni “İmperator”un eyni dönəmində komanda oyunların 73 faizində qalib gəlib və orta hesabla hər oyuna 2,24 xal toplayıb. Burukun “Qalatasaray”ı 108 oyuna 107 qol buraxdığı halda, Terimin “Qalatasaray”ı eyni sayda oyunda 125 top buraxmışdı. Terimin Buruku geridə qoyduğu yeganə göstərici vurulan qolların sayıdı (280:251).

Xatırladaq ki, “Aslan” Terimin ilk dönəmində, yəni 1990-cı illərin sonlarında ardıcıl 4 çempionluq qazanmış və 2000-ci ildə UEFA kubokunu qazanaraq tarixi uğur əldə etmişdi. Burukun bundan sonrakı dönəminin necə alınacağı da böyük maraqla gözlənilir.