Çempionlar Liqasında əsas mərhələnin 5-ci turuna yekun vuruldu.

"Football-plus.az" xəbər verir ki, tanınmaz vəziyyətdə olan və günü-gündən geriləyən ''Liverpul''un qara günləri davam edir.

Premyer-liqanın son iki turunda darmadağınlara məruz qalan ''qırmızılar'' bu dəfə evdə PSV ilə görüşdə yaxşı nəticə qazanmağa və qara zolaqdan çıxmağa ümid edirdilər. Amma durum daha da qəlizləşdi. Əvvəlcə Van Diyk çox yersiz penaltiyə və komandasının hesabda geri düşməsinə səbəbkar oldu. Niderlandlı müdafiəçi bu mövsüm artıq 3-cü dəfə penaltiyə səbəbkar oldu. Fasiləyə qədər Soboslai bərabərlik qolunu vurdu. Yerli fanatlar ikinci hissədə geridönüşə ümid bəsləyirdilər.

Amma əksinə növbəti dəfə sevimlilərinin darmadağın edilməsinin şahidi oldular. Niderland çempionu ikinci hissədə daha 3 qol vuraraq yekunda 4:1 hesablı parlaq qələbə qazandı. PSV avrokuboklar tarixində ''Enfild''də ''Liverpul''a ən azı 4 qol vuran cəmi 2-ci klub oldu. ''Real'' 2023-də bu stadionda 5 qol vurmuşdu. Bu fiaskodan sonra ''Liverpul'' üçün yenə xoş olmayan tarixi faktlar ortaya çıxdı. Komanda ardıcıl 3-cü oyunda darmadağın oldu (top fərqi - 1:10). Mersisaydlıların ardıcıl 3 rəsmi oyunda 3 qol buraxması faktına sonuncu dəfə 1992-ci ildə, ardıcıl 3 rəsmi oyunda ən azı 3 top fərqi ilə uduzması faktına isə 1953-cü ilin sentyabrında rast gəlinmişdi! Bundan başqa komanda sentyabrın 27-dən bu yana keçirdiyi 12 rəsmi oyunda 9 məğlubiyyətlə üzləşib. ''Liverpul''un sonuncu dəfə 12 oyuna 9 məğlubiyyət yaşadığı dönəm 1953-54-cü illərə təsadüf etmişdi.

İngiltərə çempionu ötən mövsüm bütün turnirlərdə ümumilikdə 10 dəfə uduzmuşdusa, bu mövsüm artıq indidən 10 məğlubiyyətə çatıb! İstefası gündəmdə olan Arne Slot üçün PSV ən uğursuz rəqibdi. O, məşqçi karyerasında ən çox (5) məğlubiyyəti məhz PSV önündə yaşayıb.