Məhəmməd Salah ''Liverpul''da tarix yazmaqda davam edir. İngiltərə nəhəngi Çempionlar Liqasında əsas mərhələnin 6-cı turunda ''Jirona''nın qonağı oldu.

Mersisaydlılar minimal hesabla üstün olaraq qələbə seriyasını davam etdirdilər. Arne Slotun komandası 6-cı oyunda 6-cı qələbəsini qazandı. Görüşdə yeganə qolu ikinci hissənin ortalarında penaltidən Salah vurdu. Misirli ulduz ''qırmızılar''ın heyətində 371-ci oyunda 227-ci qolunu vurdu. İndi onu klub tarixinin ən məhsuldar oyunçuları siyahısında 4-cü pillədə qərarlaşan Billi Liddelldən (534 oyun 228 qol) cəmi 1 qol ayırır.

Ən əsası Salah ''Liverpul'' tarixində avrokuboklarda 50 qol həddinə çatan ilk futbolçu oldu. O həm də ÇL-də 93-cü oyunda 50-ci qolunu vurdu və turnirin tarixində 50 qol həddinə çatan 11-ci futbolçu oldu. Təcrübəli futbolçu bu mövsüm 22 rəsmi oyunda 16 qol, 12 məhsuldar ötürməlik mükəmməl performans sərgiləyib.

ƏLİ