''Qalatasaray'' Çempionlar Liqasında təsnifat mərhələsinin pley-offunda səfərdə ''Yanq Boyz''la qarşılaşdı.

Türkiyə çempionu bu matçda fanatlarını sevindirə bilmədi. İsveçrə çempionu Joel Monteyronun qolları ilə fasiləyə iki topluq üstünlüklə yollandı. Hər iki buraxılan qolda Musleranın inamsız oyunu diqqət çəkdi. Bu azmış kimi təcrübəli qapıçı ilk yarının sonlarında zədələndiyi üçün fasilədə əvəzləndi.

''Qalatasaray'' ikinci hissədə əvəzetmələr sayəsində oyuna döndü. Xüsusilə Mişi Batşuayi özünü yaxşı tərəfdən göstərərək 6 dəqiqə aralığında 2 qol vurdu. Belçikalı forvard son 14 ildə avrokubok matçında sonradan meydana çıxaraq 2 qol vuran ilk ''Qalatasaray''lı futbolçu oldu. Sonuncu dəfə bunu 2010-cu ilin avqustunda Avropa Liqasının təsnifatının pley-offunda ''Karpatı'' ilə ev matçında (2:2) Milan Baroş bacarmışdı. Amma Batşuayinin qəhrəmanlığı Türkiyə çempionunu məğlubiyyətdən xilas etmədi.

Oyunun sonlarına yaxın Əbdülkərim Bardakcı ''Cim-Bom''u pis vəziyyətdə qoydu. Təcrübəli müdafiəçi həm əllə oyuna görə penaltiyə səbəbkar oldu, həm də ikinci sarı vərəqəni görərək meydanı vaxtından əvvəl tərk etməli oldu. ''Yanq Boyz''un heyətində Uqriniç fürsəti boşa verməyərək qələbə qolunu vurdu. Cavab oyunu avqustun 27-də keçiriləcək.

ƏLİ