''Liverpul'' öz nəticələri ilə nəinki fanatlarını, eləcə də bütün futbol dünyasını şoka salmaqda davam edir.

"Football-plus.az" xəbər verir ki, son çempion statusunda olan komanda bu dəfə doğma divarlar arasında tura düşmə zonasında, daha doğrusu 19-cu pillədə daxil olan ''Nottingem Forest'' önündə rüsvay oldu. Bu oyuna qədər səfərdə qələbəsi olmayan Nottingem klubu ''Enfild Roud''da ağızları açıq buraxan bir performans sərgiləyərək 3 cavabsız qolla qalib gəldi! Ən maraqlısı budu ki, ''Liverpul'' çempion olduğu ötən mövsümdə də bu rəqibə evdə qol vurmadan uduzmuşdu (0:1).

''Nottingem Forest''in ''Liverpul''u səfərdə darmadağın etməsi faktı isə sonuncu dəfə 1908-ci ildə qeydə alınmışdı (5:1). Arne Slotun komandasının bəzi statistik göstəriciləri çox bərbad səviyyəyə çatıb. 12 turdan sonra 11-ci pilləyə geriləyən mersisaydlıların aktivində cəmi 18 xal var (6 qələbə, 6 məğlubiyyət). Bu, 2016-dan bu yana son çempion statusunda olan komandalar üçün ən bərbad başlanğıcdı.

9 il öncə bu statusda olarkən ''Lester'' 12 tura 12 xal toplamışdı. Daha bir heyrət doğuran məqam odu ki, ''qırmızılar'' son 55 ildə ilk dəfə çempionatda ardıcıl iki turda böyükhesablı məğlubiyyətə düçar oldular. Ötən tur komanda səfərdə ''Mançester Siti''yə də 3 cavabsız qolla uduzmuşdu. 1965-ci ildə ''Liverpul'' Bill Şenklinin başçılığı altında bu cür aqibətlə üzləşmişdi. Ümumiyyətlə, premyer-liqa yaranandan, yəni 1992-dən bu yana ''Liverpul'' 4-cü dəfə evdə 3 top fərqilə uduzaraq antirekordunu təkrarladı. Komanda daha öncə 2005-də ''Çelsi''yə (1:4), 2015-də ''Vest Hem''ə (0:3) və 2021-də ''Mançester Siti''yə (1:4) evdə 3 top fərqi ilə uduzmuşdu. Aleksander İsaka isə bu gedişlə ''heykəl qoyulacaq''.

Yayda premyer-liqa üçün rekord məbləğə - 125 milyon funt sterlinqə transfer edilən isveçli forvard yeni klubunda 5-ci premyer-liqa oyununda da qol vura bilmədi. Ən əsası o, ''Liverpul''un start heyətində meydana çıxdığı 4 premyer-liqa matçının hamısında məğlub olub! ''Qırmızılar''ın start ''11-liy''ində meydana çıxdığı ilk 4 çempionat matçının hamısında məğlub olan sonuncu futbolçu 1906-cı (!) ildə Persi Sol olmuşdu.