''Liverpul'' qəribə mövsüm keçirməkdə davam edir. İlk baxışdan son çempion statusunda olan komanda üçün mövsüm heç də pis başlamamışdı.

Superkubokda penaltilər seriyasında ''Kristal Pelas''a uduzmaqla ''futbol ili''nə başlayan mersisaydlılar sonrakı ardıcıl 7 rəsmi oyundan qələbə ilə ayrılmışdılar. Özü də komandanın tez-tez xarakter nümayiş etdirməsi diqqət çəkirdi. ''Qırmızılar'' bu 7 qələbədən 6-da həlledici qolları 80-ci dəqiqədən sonra vurmuşdu. 3-də isə ümumiyyətlə qələbə qolları əsas vaxta əlavə olunmuş dəqiqələrə təsadüf etmişdi. Amma son oyunlarda tamamilə əks bir mənzərə izləyirik.

Ötən həftə ''Kristal Pelas''a, həftəiçi Çempionlar Liqasında ''Qalatasaray''a uduzan ''Liverpul'' dünən də ''Çelsi''yə boyun əydi. Özü də komanda son iki premyer-liqa matçında 90-cı dəqiqədən sonra buraxdığı qollarla məğlub olub! Buna qədər premyer-liqada son çempionun mövsüm ərzində iki dəfə 90-cı dəqiqədən sonra buraxdığı qollarla uduzması faktına yalnız bir dəfə rast gəlinmişdi. Bu aqibəti 2004/05-də ''Arsenal'' yaşamışdı.

Onu da bildirək ki, ''Liverpul''un ardıcıl 3 rəsmi oyunda uduzması sonuncu dəfə 2023-cü ilin mart-aprelində baş vermişdi. Həmin vaxt Yürgen Kloppun başçılıq etdiyi komanda ''Bornmut''a (0:1), ''Real''a (0:1) və ''Mançester Siti''yə (1:4) boyun əymişdi.

''Liverpul''un indiki çalışdırıcısı Arne Slot isə məşqçi karyerasında ilk dəfə bu cür uğursuz seriya ilə üzləşib.