Dekabrın 1-də Türkiyə futbolunun 1 nömrəli derbisi baş tutacaq.

"Football-plus.az" xəbər verir ki, ''Fənərbaxça'' doğma meydanda ''Qalatasaray''ı məğlub edərək bu mövsüm ilk dəfə liderliyə yüksəlməyə çalışacaq. ''Cim-Bom'' heyətlə bağlı ciddi problemlər yaşayır.

Bu arada ''Fənər'' də derbi ərəfəsində əsas qapıçısı Edersonu itirmək təhlükəsi ilə üz-üzə qalıb. Məsələ burasındadı ki, ''Fənər''in ötən tur ''Çaykur Rizəspor'' səfərində keçirdiyi oyun zamanı Edersonun telefonla çəkilmiş bir görüntüsü sosial şəbəkələrdə sürətlə yayılaraq böyük müzakirələrə səbəb olub. Ən əsası ünlü qapıçı 41-ci maddə ilə Nizam-İntizam Komitəsinə sövq edilib!

Qapı arxasındakı tribunadan çəkilən görüntüdə Ederson əvvəlcə yerli fanatlardan biri ilə nəyisə müzakirə edir. Sonrakı anda isə o, əlini cinsi orqanına aparır. Ancaq bunu konkret bir nəfərə qarşı etmir. Braziliyalı qapıçı bu hərəkəti edərkən yerə baxır. Hələlik videonun real olması təsdiqini tapmayıb, çünki bəziləri bunun montaj olduğunu iddia edir.

Ancaq ''Qalatasaray'' daha öncə Mauro İkardinin buna bənzər olay üzündən 1 oyunluq cəza aldığını əsas gətirərək federasiyaya müraciət etməyə hazırlaşır. 2024-cü ilin fevralında İkardi də ''Ankaragücü'' ilə səfər oyununda tribunalar onunda əlini cinsi orqanına qoymuş və buna görə NİK tərəfindən 1 oyunluq cəza almışdı.

''Fənərbaxça'' futbolçusunu müdafiə etmək üçün fəaliyyətə başlayıb. Edersonun əvvəlki klublarında da buna bənzər görüntüləri toplanılaraq NİK-ə təqdim olunacaq. ''Fənər'' Edersonun bu hərəkəti tribunalara qarşı etmədiyini sübuta yetirməyə çalışacaq.