Mövsüm sona yaxınlaşdıqca Türkiyə futbolunda yenə gərginlik artmağa başlayır.

Ötən həftə “Qalatasaray”ın əsas qol silahı Mauro İkardinin qeyri-etik hərəkətə yol verdiyini diqqətinizə çatdırmışdıq.

Təcrübəli forvard 26-cı turda “Ankaragücü” ilə səfər oyununun gedişində yerli fanatlara tərəf dönərək əlini cinsi orqanına qoymuşdu. Onun telefonla çəkilmiş görüntüsü sosial şəbəkələrdə söz-söhbət doğurmuşdu. “Qalatasaray” isə həmin videonun montaj olduğunu iddia edirdi. Amma Türkiyə Futbol Federasiyası olayı araşdıraraq videonun montaj olmadığı qənaətinə gəldi və argentinalı hücumçu Nizam-İntizam (NİK) Komitəsinə sövq edildi. Əvvəlki illərdə bu cür qeyri-etik hərəkətə yol verən futbolçulara ən azı 4-5 oyunluq cəza verilirdi. Amma NİK qəribə şəkildə İkardiyə ciddi cəza verməkdən boyun qaçırdı. Belə ki, dünən futbolçuya yalnız 1 oyunluq cəza verildiyi açıqlandı! Bu da o deməkdi ki, 30 yaşlı hücumçu cəzasını “Antalyaspor”la dünənki oyunda çəkib və həftəsonu “Beşiktaş”la prinsipial derbidə meydanda olacaq.

TFF-nin nəzdində fəaliyyət göstərən NİK-in bu qərarından sonra aləm bir-birinə dəydi. Həm “Fənərbaxça”, həm də “Beşiktaş” bu qərara etiraz etdi. “Fənər”in mətbuat katibi və idarə heyətinin üzvü Səlahəttin Baki federasiyanı yıxıb-sürüdü. O, bu qərarı “sözün bitdiyi yer” adlandıraraq bu hörmətsizliyin təkcə “Ankaragücü” fanatlarına yox, bütövlükdə Türkiyə idmanına edildiyini bildirdi. “Sarı-lacivərdlilər”in rəsmi “tvitter” səhifəsi isə yaydığı etiraz bəyanatında İkardi ilə federasiya prezidenti Mehmet Büyükekşinin yan-yana durduğu bir şəkli paylaşdı. Maraqlıdı ki, digər tərəfdən “Qalatasaray” özü də qərarın ağır (!) olduğunu düşünərək Apellyasiya Komitəsinə müraciət etdi. Komitə tələm-tələsik dünən yerli vaxtla saat 17.00-da toplandı. Çünki belə qərarlar rəsmi matçdan ən azı 72 saat öncə verilməlidi. “Cim-Bom”un etirazı təmin edilsəydi, İkardi dünən meydana çıxa biləcəkdi. Amma komitə NİK-in qərarını qüvvədə saxladı. Beləliklə, İkardi yalnız bir matç buraxmalı oldu.