İkardi qeyri-etik hərəkətə yol verib?
“Qalatasaray”ın göz bəbəyi Mauro İkardi son günlər yenə gündəmdədi.
Məşhur argentinalı forvard fevralın 19-da 31-ci doğum gününü qeyd etdi. Bazar ertəsi “Cim-Bom”un məşqi olmadığından çərşənbə axşamı səhər məşqindən öncə tort kəsildi, İkardinin doğum günü qeyd olundu. Amma həmin gün bu futbolçu həm də başqa bir olaya görə gündəm mövzusuna çevrildi. Ötən həftəsonu, bilindiyi kimi, “Qalatasaray” səfərdə “Ankaragücü”nü 3:0 məğlub edərək liderliyini davam etdirdi. Srağagün sosial şəbəkələrdə həmin matçda İkardiyə aid bir görüntü ortaya çıxdı. Telefonla çəkilən videoda təcrübəli forvardın tribunadan atılan yad cismə əsəbləşərək əlini cinsi orqanına qoyduğu və yerli fanatlara qarşı qeyri-etik hərəkətə yol verdiyi görünür.
Bu görüntü nəinki “Ankaragücü”, eləcə də “Fənərbaxça” caiməsinin açıqlama verməsinə səbəb oldu. Paytaxt klubunun rəsmi bəyanatında İkardinin idmançıya yaraşmayan hərəkətə görə Nizam-İntizam Komitəsinə (NİK) sövq edilməsi üçün Türkiyə Futbol Federasiyasına müraciət ünvanlandığı qeyd olundu. “Fənər”in baş katibi Burak Kızılhan isə sosial şəbəkə səhifəsində bunları yazdı:
“Bu hərəkət səviyyəsizlikdi və rəqib fanatları təxribata sürükləmək cəhdidi. Tribunadan çəkilən həmin görüntüdə hər şey göz önündədi. TFF tərəfindən bununla bağlı bir addım atılacaqmı? Bu yanlışa görə kiminsə NİK-ə sövq edilib-edilməyəcəyini birlikdə görəcəyik”. Superliqada, adətən, tribunalara münasibətdə belə qeyri-etik davranışa yol verən futbolçulara ciddi cəza verilir və əvvəlki illərdə də dəfələrlə bunun örnəyini görmüşük. Məsələn, məhz bu cür hərəkətə görə 2021/22-də Sadik Çiftpınara 4, 2017/18-də Canər Ərkinə 6, 2012/13-də Raul Meyreleşə 4, 2003-cü ildə isə Paskal Numaya 7 aylıq cəza verilmişdi. Amma burda bir “əmma” var. “Qalatasaray” özü də şikayət etməyə hazırlaşır! Belə ki, məsələni araşdıran rəhbərlik həmin videonun montaj olduğu qənaətinə gəlib. “Cim-Bom” videonu yayanlardan şikayət etmək niyyətindədi.
Həqiqətən də çox keyfiyyətsiz çəkilən videoda bəzi detallar diqqəti çəkir. Məsələn, İkardinin cinsi orqanına qoyduğu əli qaradı. Yəni həmin ələ əlcək taxılıb. Sol əldə isə əlcək yoxdu. Həmin oyunda argentinalı, ümumiyyətlə, əlcək taxmamışdı! TFF-nin isə bu görüntüyə görə İkardiyə cəza verməsi üçün ilk növbədə videonun real olub-olmaması peşəkarlar tərəfindən yoxlanılmalıdı.
ƏLİ
Digər xəbərlər
