''Fənərbaxça'' ilə bağlı zədə xəbəri var. İstanbul nəhənginin superliqanın 8-ci turunda ''Samsunspor''a qarşı keçirəcəyi oyundan öncə əsas qapıçı Edersonun zədələndiyi məlum olub.

Braziliyalı qapıçı şənbə günkü məşqdə zədələnmişdi. Amma komanda ilə birlikdə Samsuna yollanmağa qərar vermişdi. Ağrıları davam etdiyi üçün o, Samsunda tibbi müayinədən keçirildi və zədəsinin ciddi olduğu üzə çıxdı.

Təcrübəli əlcək sahibinin ''Samsunspor''la oyunu buraxacağı, ya da ən pis halda ağrıkəsici ilə oynayacağı gözlənilir. Amma Edersonun adı artıq Braziliya yığmasının heyətindən çıxarılıb. ''Pentakampeonlar''da onun yerinə heyətə Con Viktor çağırılıb. Xatırladaq ki, Ederson baş məşqçi Karlo Ançelotti tərəfindən açıqlanan bu dəfəki siyahıya düşərək bu il ilk dəfə Braziliya yığmasına dəvət almışdı.

Braziliyalıları qarşıda Koreya və Yaponiyaya qarşı yoxlama oyunları gözləyir. Ançelotti Koreya ilə oyunda əsas heyətdə Edersonun yer alacağını bildirmişdi. Amma göründüyü kimi 32 yaşlı qapıçı ciddi şanssızlıqla üzləşdi.