“Böyük dəbilqə” turnirlərinin 24 qat qalibi Novak Cokoviç karyerasına 16-cı dəfə mövsümü ATP reytinqinin ilk “4-lüy”ündə bitirəcək.

"Football-plus.az" xəbər verir ki, serbiyalı ulduz tennisçi bu göstəricidə dünya rekordunu yeniləyib. İndiyə qədər bu rekord isveçrəli Rocer Federerə məxsus idi (top-4-də 15 mövsüm). Cokoviçin başa çatmaqda olan ildə bütün “Böyük dəbilqə” turnirlərində yarımfinala qədər irəlilədiyini də vurğulayaq. O, həmçinin ATP-nin Cenevrə və Afinada keçirilən turnirlərinin qalibi olub.

Cokoviçlə bağlı daha bir cəlbedici xəbər var. “Greek City Times” nəşri Serbiyanın “Sportal” portalına istinadla xəbər verir ki, ona artıq Yunanıstanın qızıl vizası təqdim olunub. Novak və ailəsi Yunanıstan iqtisadiyyatına yatırım etdiyinə görə belə vizaya layiq görülüb. Proqramda iştirak üçün ən azı 352 min funt (464 min dollar), Afina regionunda isə 705 min funt (929 min dollar) yatırım etmək tələb olunur.

Qızıl vizanın sahibləri adi viza almadan sərbəst şəkildə Şengen zonası ölkələrini gəzə bilər. Bu sənəd müddətsizdi, avtomatil şəkilə tennisçinin xanımına, 21 yaşa qədər olan uşaqlarına və hər iki tərəfin valideynlərinə də imtiyaz tanıyır. Cokoviçin hələ sentyabrda ailəsi ilə birgə yaşamaq üçün Yunanıstana köçdüyünü və müvafiq icazə aldığını da xəbər vermişdik.

Məşhur tennisçinin Yunanıstanla bağlı yatırım planları da bəllidi. Cokoviç Afina ətrafında yerləşən Elinikon şəhərciyində Tennis Mərkəzi tikdirmək fikrindədi. “Tennis24”ün yaydığı xəbərə görə, layihənin dəyəri 20 milyon avrodu. Yeni mərkəzdə tennis, padel və piklbol oynamaq üçün nəzərdə tutulan 20-dən artıq kort salınacaq.