"Sumqayıt" rəsmisi azarkeşlərdən üzr istədi - səbəb
Misli premyer-liqasının 12-ci turu çərçivəsində keçirilən "Sumqayıt" - "Qarabağ" oyunu (4:2) təkcə meydanda və tribunada yox, həm də stadionun çölündə yaşanan hadisələrlə yadda qaldı.
Fasilədə yüzə yaxın azarkeş tribunalara daxil olmağa çalışırdı. Əlində bileti olan da var idi, olmayan da. İş ondadı ki, polislər bilet alan tərəfdarları da stadion buraxmadı. Hüquq-mühafizə orqanlarının əməkdaşları hazırda "QR-kod" oxuyan aparatların olmadığını əsas gətirərək, həmin futbolsevərlərin evinə dönməsinə səbəb oldu.
Bəs, bu cür hadisənin yaşanması nə ilə bağlıdı? Həqiqətənmi böyük həvəslə stadiona yollanan, amma yubanan tərəfdarlar "QR-kod" aparatının yoxluğundan əziyyət çəkməyə məcburdu?
Bu suallarla "Sumqayıt"ın mətbuat xidmətinin rəhbəri Zaur Xudiyevə müraciət etdik. Onun "Football-plus.az"a cavabı:
"Oyun günü stadionun qapıları matçın başlamasından 90 dəqiqə əvvəl tamaşaçıların üzünə açıq olur. "Qarabağ"la matçda anşlaq olacağını nəzərə aldığımızdan idman qurğusunun iki tərəfdən olan qapılarını açmışdıq. Azarkeşlərin stadiona rahat daxil ola bilməsi və yoxlanış üçün 10 əməkdaşa xüsusi tapşırıq verilmişdi. Matçdan əvvəl həm klub olaraq biz, həm də "iticket.az" saytı bilet alan azarkeşlərə müraciət etmiş, stadiona tez gəlməyin zəruri olduğunu bildirmişdi. "QR-kod" oxuyan aparatlar "iticket.az" saytına məxsusdu. Onlar matç başlayandan 20 dəqiqə sonra stadionu tərk etdiyinə görə nəzərdə tutduğunuz tərəfdarların biletinin yoxlanılması mümkün olmayıb. Təəssüf ki, azarkeşlər belə halla qarşılaşıb. Bu səbəbdən bileti olduğu halda oyunu tribunadan izləyə bilməyən tərəfdarlardan üzr istəyirik".
KƏNAN BAHADIR
Digər xəbərlər
