“UltraSumqayıt” fanklubu qapının arxasında, “Kimyaçılar”la üzbəüz sektorda yerləşən tribunalarda əyləşir. Təəssüf ki, “Qarabağ”la matçda xoşagəlməz hal yaşandı. Ona görə ki, qonaqlar qol vurandan sonra lap yaxınlığımızdakı azarkeşlər sevindilər. Həmin anda sumqayıtlı tərəfdarlar da emosiyalarını cilovlaya bilmədi və dava düşdü. Ara yalnız polislərin müdaxiləsindən sonra sakitləşdi. Bizcə, qonaq azarkeşlərin fanklubların yanında əyləşməsi, ümumiyyətlə, həmin yerlər üçün bilet alması doğru deyil. Qeyd edim ki, söhbət “İmarət Tayfa” və ya “Qarabağ Ordu”dan yox, sıravi azarkeşlərdən gedir. İstəyirik ki, qonaqlarla bizim aramızda məsafə daha çox olsun. “UltraSumqayıt” təxminən 200 nəfərdən ibarətdi. Belə anlarda hər kəsi sakitləşdirmək çətin olur. Bununla yanaşı, stadiona gələrkən məşəllər yandırdığımıza və meydana lent atdığımıza görə hüquq-mühafizə orqanlarının ciddi müdaxiləsiylə üzləşdik. Üç üzvümüzü şöbəyə aparmaq istəyirdilər ki, müzakirələrdən sonra hər şeyi qaydasına qoya bildik. Biz azad, yəni heç kimdən asılı olmayan fanklubuq. Nə şəhərimizə, nə də “Sumqayıt”a zərər vermərik. Sadəcə, oyunların daha sabit ab-havada keçirilməsinin tərəfdarıyıq”.