Misli premyer-liqasının 30-cu turunun "Sumqayıt" - "Zirə" matçından sonra "Kimyaçılar" fanklubunun bir neçə üzvünün hüquq-mühafizə orqanlarının əməkdaşları tərəfindən saxlanıldığına şahidlik etdik.

Azarkeşlər polis avtomobilinə əyləşdirildi, bölməyə aparıldı.

Onların taleyi ilə bağlı ətraflı məlumat almaq üçün "Sumqayıt"ın mətbuat xidmətinin rəhbəri Zaur Xudiyevə müraciət etdik. Onun "Football-plus.az"a söylədikləri:

"Bəli, 7 azarkeşimiz matçın gedişində (51-ci dəqiqədə - red.) pirotexniki vasitələrdən istifadə etdiyinə görə saxlanılmışdı. Onlardan beşi məhz həmin gün klubun mühafizə xidmətinin müdaxiləsiylə azadlığa buraxıldı. İkisi isə şənbə günü azad olundu. Hazırda hər şey qaydasındadı. Azarkeşlərlə bağlı hansısa problem yoxdu".

Xatırladaq ki, cümə günü "Mehdi Hüseynzadə"də keçirilən oyunu tribunalardan 4500 tamaşaçı izləyib.

KƏNAN BAHADIR