10-cu tur da maraqlı mübarizə şəraitində keçdi. Yüksək məhsuldarlıq, əzmkar qələbələr, Abubakar fırtınasının davamı, “Turan Tovuz”un dönüşü və “Qarabağ”ı növbəti dəfə “taxtdan salması” – bir sözlə, üzərində dayanmalı olduğumuz detal çoxdu.

Tur “Qarabağ”ın qələbəsi və növbəti dəfə zirvəni ələ keçirməsi ilə başladı. Hərçənd cümə günü keçirilən oyunun əvvəlində Ronaldo penaltini qola çevirsəydi, “İmişli” meydandan xalla da ayrıla bilərdi. Yeri gəlmişkən, Qurban Qurbanov ənənəsinə xilaf çıxaraq dəyişikliklərə çox gec əl atdı və oyundan sonra bunu futbolçularını meydanda daha çox saxlamaq istəyi ilə izah etdi. Bu, “Çelsi” ilə oyunun baş məşqi idi. Prinsipcə pis alınmadı. Amma görək premyera necə alınacaq...

Şənbə günü “Zirə” iki dəfə hesabda geri düşdü, amma hər dəfə də nəinki hesabı bərabərləşdirməyi, hətta qələbə topunu vurmağı da bacardı. “Karvan-Yevlax” isə təcrübəsizlikdən və qeyri-sabitlikdən əziyyət çəkir. Məsələn, qapıçı Kamran İbrahimov “Neftçi” qarşısında divə çevrilir, “Zirə” ilə oyunda isə az qala bütün zərbələrə boyun əyir. Belə oyunla elitada qalmaq çox çətin görünür.

Sadəcə, yevlaxlılar “Kəpəz” kimi qonşusunun olmasına görə dua etməlidi. Gəncəlilər “Neftçi” önündə varlığını ortaya qoya bilmədi. Bakılıların get-gedə daha yaxşı oyun göstərməsi öz yerində, sadəcə, meydana çıxan komandalar fərqli çəki dərəcəsində çıxış edən boksçuları xatırladırdı. Və Abubakar fərqi də var. Yerli hücumçulara onun oyununa diqqətlə baxmağı məsləhət görürəm. Kamerunlu ulduz ideal formada olmasa da, epizod başa çatana qədər mübarizə aparır, necə olur-olsun, qapıya yol tapmağa çalışır. Allah da beləsini mükafatlandırır!

“Turan Tovuz” doğma şəhərə döndü, “Şamaxı” üzərində əzmkar qələbə qazanmaqla yenidən zirvəni ələ keçirdi, özü də 6 minə yaxın azarkeşin gözü önündə. Bura qədər hər şey yaxşı getdi. Amma yeni salınan qazonun durumu, sadəcə, təəssüf doğurdu. Çox güman, “Turan Tovuz” rəhbərliyi tələsik addımın fəsadını hiss edəcək. Hər halda, gözləmək daha yaxşı olardı. Bazar günü keçirilən 2-ci oyunda “Araz-Naxçıvan” büdrədi. İddialı naxçıvanlılar geri düşdükləri oyunun axarını dəyişə bilsələr də, Kehatın ikinci qolundan sonra toparlana bilmədilər. Belədə bir pillə geriləyən komanda hətta 5-ci yeri də əldən vermək təhlükəsi ilə üzləşdi.

Axı “Sabah” meydana bütün iddialılardan sonra çıxdı. Gözlənildiyi kimi, “bayquşlar” “Qəbələ” ilə oyunda qələbə qazandı. Valdas Dambrauskasın komandası hazırda 18 xalla 4-cü pillədə qərarlaşıb. Daha bir mümkün qələbə “Sabah”ı zirvəyə şərik edəcək.

Misli premyer-liqası
1-ci dövrə, 10-cu tur
31 oktyabr
Qarabağ – İmişli 2:0
1 noyabr
Karvan-Yevlax – Zirə 2:3
Neftçi – Kəpəz 5:1
2 noyabr
Turan Tovuz – Şamaxı 2:1
Sumqayıt – Araz-Naxçıvan 3:2
3 noyabr
Sabah – Qəbələ 1:0

1. Turan Tovuz 10 7 0 3 15-8 21
2. Qarabağ 9 6 2 1 15-3 20
3. Zirə 10 5 4 1 18-12 19
4. Sabah 9 5 3 1 13-5 18
5. Sumqayıt 10 5 2 3 16-11 17
6. Araz-Naxçıvan 10 4 4 2 16-16 16
7. Neftçi 10 3 6 1 14-7 15
8. İmişli 10 3 3 4 10-11 12
9. Şamaxı 10 2 4 4 11-13 10
10. Qəbələ 10 1 2 7 8-14 5
11. Karvan-Yevlax 10 1 2 7 8-22 5
12. Kəpəz 10 1 0 9 7-29 3

Bombardirlər: Ba-Muaka Simakala (Araz-Naxçıvan) – 6, Coy-Lens Mikels (Sabah) – 5, Bassala Sambu (Neftçi) - 4.

ORXAN