Misli premyer-liqasının 32-ci turunda, nəhayət, çempionun adına aydınlıq gəldi. Əlbəttə, məhz “Qarabağ”ın çempion olacağı gün kimi aydın idi, sadəcə, zaman maraq doğururdu. Ağdam təmsilçisi son 12 mövsümdəki 11-ci çempionluqla ölkə futbolundakı hegemonluğunu bir daha sübut etdi. Bəs başqa komandalar? Hər birinin özünə görə hədəfləri və qayğıları var...

Turun açılış matçı Tovuzda keçirildi. Hər iki komanda qələbə qazanmağa çalışsa da, 1:1 hesabı qeydə alındı. “Turan Tovuz” növbəti dəfə standart vəziyyətdən fərqlənməyi bacardı. “Şamaxı” isə əks-hücumlarda daha təhlükəli görünürdü. Bu heç-heçəni tovuzlular üçün xal itkisi saymaq lazımdı. Onlar “Qarabağ”ın ölkə kubokunu qazanacağına necə ümidlidilərsə, itirilən xalları saya-hesaba almırlar. Ya da ən azı kənardan belə mənzərə görünür. Yeri gəlmişkən, turdakı üç 1:1-dən birincisi məhz bu oyuna təsadüf etdi.

Eyni stadionda keçirilən 2-ci oyunda da məhsuldarlıq aşağı oldu. “Zirə” “Kəpəz”in qapısından bir top keçirməklə, demək olar ki, 2-ci yeri təmin etdi. Əslində gəncəlilərin də üzərinə çox getməyə dəyməz. Axı “Səbail”lə xal fərqi yetərincə böyükdü. Bu məqam istər-istəməz “Kəpəz”in əhval-ruhiyyəsinə, oyuna köklənməsinə təsir göstərir.

Bazar günü keçirilən hər iki oyun 1:1 bitdi. “Araz-Naxçıvan” yenə hesabı açandan sonra arxayınlaşdı və qələbəyə hava-su kimi ehtiyac duyan “Səbail”in fəallaşmasına şərait yaratdı. Meydan sahibləri fəallaşdı, hesabı bərabərləşdirdi və bundan artığına gücü çatmadı. İndi onları elitada yalnız möcüzə saxlaya bilər. Hər halda, “Səbail”in aşağı yuvarlanmasında da bir rəmzi məna tapmaq mümkündü. Paytaxt klubu 2026-da – 10 illiyini qeyd edəndə elitaya qayıdar... “Araz-Naxçıvan” “Turan Tovuz”la xal fərqini artırmağa həvəs göstərmədi. Bu komandanın son oyunun yalnız birində qələbə qazanması heç də yaxşı statistika deyil. “Qırmızı-ağlar” sanki mövsümün sonunda hər şeydən doyub.

“Sabah” – “Qarabağ” oyunu kubokun baş məşqi idi. Sırf bu oyuna əsasən mülahizə yürütsək, bizi finalda da maraqlı mübarizə gözləyir. Bu duellə bağlı daha bir maraqlı məqam Qurban Qurbanovun hələ də Vasili Berezutskiyə qalib gələ bilməməsidi. Hərçənd iki-üç ildən sonra bu məqam yox, “Qarabağ”ın çempionluğu məhz “Sabah”ın stadionunda rəsmiləşməsi xatırlanacaq. Klub tarixindəki 12-ci, ardıcıl 4-cü çempionluğu!
Tura dünən keçirilən “Sumqayıt” – “Neftçi” oyunu ilə yekun vuruldu. Hədəflərindən uzaq düşən komandaların necə motivasiya qaynağı tapa biləcəyini düşünürdük. 4 qolun vurulduğu oyunda qalib müəyyənləşmədi. Halbuki “Neftçi” qələbə qazansaydı, 5-ci yerə iddiası daha real cizgi qazanacaqdı.

25 aprel
Turan Tovuz – Şamaxı 1:1
26 aprel
Kəpəz – Zirə 0:1
27 aprel
Səbail – Araz-Naxçıvan 1:1
Sabah – Qarabağ 1:1
28 aprel
Sumqayıt – Neftçi 2:2

1. Qarabağ 32 24 5 3 78-19 77
2. Zirə 32 20 4 8 55-26 64
3. Araz-Naxçıvan 32 14 12 6 32-25 54
4. Turan Tovuz 32 12 13 7 39-36 49
5. Sabah 32 8 16 8 44-43 40
6. Neftçi 32 8 12 12 32-45 36
7. Şamaxı 32 9 8 15 30-40 35
8. Sumqayıt 32 8 6 18 27-48 30
9. Kəpəz 32 7 7 18 25-56 28
10. Səbail 32 4 9 19 26-50 21

Bombardirlər: Leandro Andrade (Qarabağ) – 14, Salifu Suma (Zirə) – 11, Cesse Sekidika (Sabah), Davit Volkov (Zirə) – 10.

Növbəti turun oyunları mayın 2-4-ü aralığında keçiriləcək: “Zirə” – “Turan Tovuz”, “Şamaxı” – “Səbail”, “Araz-Naxçıvan” – “Sabah”, “Qarabağ” – “Sumqayıt”, “Neftçi” – “Kəpəz”.

ƏSƏD SEYİDOV